Arsenal dinhmun chinfel zan

Champions League last 16 khel turin Arsenal leh Paris Saint-Germain te chu an tling chiang tawh. Zanin hian Group A hmahruaitu chinfel a ni dawn. Dar 1:15-ah Gunners hi Swiss club FC Basel khel turin an zin chhuak ang; Ligue 1 champion PSG chuan Ludogorets an lo mikhual thung dawn.

Premier League pahnihna Arsenal hi EFL Cup quarterfinal (League Cup) aṭanga an tlak hnuah an insiam ṭha tawh a, kartawp inkhelah Alexis Sanchez-a hattrick hmangin West Ham 5-1 in an sawp. An khingpui tur Basel erawh Swiss Super league-a an match hnuhnung berah Young Boys lakah 3-1 in an tlawm thung.

Arsenal manager Arsene Wenger chuan, "Khualmuala kan inkhelh hian dawhtheihna kan nei tam a, season dang nena khaikhin chuan tun season-ah hian goal khung tura hun ṭha kan insiam tam loh ngaihtuahin kan pet goal hnem. Ka naute hian hmathlir thui tak an neih bakah an huaisen," a ti.

French manager Wenger-a naute hian kum 17 chhung zet chu a zawnin Champions League group stage an khel tawh. Tun hnai kum ruk chhung bikah last 16 an lut ziah; Barcelona leh Bayern Munich te ṭum hnih an hmachhawn bakah AC Milan leh AS Monaco an hmachhawn bawk - vawi khatmah quarterfinal an lut lo.

Gunners tan group hmahruitu ni tur chuan chak loh a thiang lo a, point thum an hmuh ngei a ngai. Hnehna an chang a nih pawhin inkhel dangah PSG-in point an hloh a ngai ang. French champion PSG tan erawh hmahruaitu ni tlang turin hnehna chan a tawk thung.

Arsenal leh PSG te hi Parc des Princes-ah 1-1 in an inhehtawk tawh a, Emirates Stadium-ah 2-2 in an in draw leh bawk. Point hmuh zat inangah head-to-head en a nih avangin khualmuala goal khung hnem zawk PSG dinhmun a ṭha zawk a ni.

French champion PSG hi kartawp league match-ah Montpellier lakah 3-0 in an tlawm a, inkhelh banah manager Unai Emery chuan an chak lohna chu insiamṭhat nan an hman tur thu a sawi.

Spanish manager Emery chuan, "Montpellier khan min beng harh rawh se. Kan inkhelah rilru kan sawr bing nasa leh zual tur a ni ang, tihsual a awm tur a ni lo," tiin a zawna chak lo nih a tum lo hle. PSG president Nasser Al-Khelaifi pawhin group hmahruaitu an nih theih nan an team chu an insiamthar ngei a beisei thu a lo sawi ve bawk.

PSG hian tun hnaiah a zawnin season li chhung Champions League quarterfinal an lut a, hei aia sang erawh an thleng thei lo. Laurent Blanc banin a zawna Europa League champion vawi thum ni thei Sevilla coach Emery an ruai - club neitu lamain beiseina an nei sang a, Emery tan last 16-a group dang hmahruaitu pumpelh theih nan hnehna chan a pawimawh khawp ang.