Chungnung zawk nih inchuh Real Madrid mikhual tur Dortmund

Zanin dar 1:15 hian Real Madrid leh Borussia Dortmund te chu Santiago Bernabeu-ah an inhmachhawn dawn. Zinedine Zidane-a naute tan Champions League Group F hmahruaitu ni turin hnehna chan ngei a ngai, an inhnehtawk a nih erawh chuan Dortmund hi hmahruaitu an ni tlang ang.

Dortmund-in group match nga khelh tawh aṭangin point 13 an hmu tawh a, an elpui Real Madrid lakah hian point hnihin an sang mek. German club huaisen leh Spanish club hlun hian last 16 an lut chiang tawh - Sporting CP leh Legia Warsaw te inkhel turin knock out round lamah nghawng a nei tawh lo.

Match 34 nan?

Kum 1988/89 khan Leo Been-hakker kaihhruaina hnuai-ah Real Madrid hian a zawnin match 34 chhung hneh loh nei loin an lo kaltluang tawh. Dutch manager Beenhakker-a'n ni 189 chhunga record duhawm tak a lo hnutchhiah tawh hi tun thlengin khum thei an la awm lo. He mi season hian La Liga bakah Copa del Rey nomawi an chawi.

Kumin April 7 khan Real Madrid hi Wolfsburg khelmualah 2-0 in an tlawm. April 9, 2016-ah Eibar 4-0 a sawpin an insiamṭha nghal a, tunah hian Zidane-a kaihhruaina hnuaiah match 33 chhung zet chu hneh loh an tawng tawh lo - zanin hian an tlawm lo a nih chuan Beenhakker-a record lo siam tawh an nihrual ang.

French manager Zidane-a'n a team match 33 chhung hneh loh tawng lo a kaltluanpui tur hian ni 239 a mamawh, mahse hengah hian nipui chawlh lai chhiar tel anih avangin a ni zat hi a tam bik tih erawh hriat a ṭul. Zidane hian Champions League leh UEFA Super Cup-ah te hlawhtlinna a chang tawh thung.

Bernabeu hmangthiam Real

September 28 khan club pahnihte hi an group match hmasa ber atan an lo intawng tawh. Signal Iduna Park-ah Madrid tan Cristiano Ronaldo leh Raphael Varane ten goal khungin Dortmund tan Pierre-Emerick Aubameyang leh Andre Schurrle ten an sut a, 2-2 in an inhnehtawk.

Real Madrid hian tun hmain Dortmund hi vawi nga an lo mikhual tawh a, vawi li hnehna chang tawhin ṭum khat chu an inhnehtawk thung. An mikhual hnuhnung match pahnihah phei chuan goal chhuah miah loin hnehna an chang ve ve - an sulhnu en chuan French manager Zidane-a naute hi chak zawk tura ngaih an ni.

Spanish club Real hian German club lakah sulhnu an lo nei ṭha tawh ṭhin hle. German club hrang hrang vawi 29 an lo mikhual tawhah ṭum 22 hnehna an chang a, vawi li inhnehtawkpuiin ṭum thum an chak lo thung.

Tunlai boruak

Real Madrid hian hliam vangin khawvela player manto pahnihna Gareth Bale an la chhawr thei dawn lo. Kar tawp El Clasico-a Barcelona nen 1-1 a an inhnehtawk ṭuma inlan thei lo Alvaro Morata, Danilo leh Fabio Coentrao te an dam tawh a, an lawmna ber tur chu midfielder pawimawh Toni Kroos-a'n training a zawm leh tawh hi a ni ngei ang.

La Liga hmahruaitu Real hi mikhual tana inkhelh a harsatna berte zinga mi Nou Camp-a lenglut hlim an ni. Luis Suarez a goal khung chu captian Sergio Ramos-a'n hun tawp dawnah sutin point khat an hlawh chhuak, league-ah chuan Catalan club lakah hian point rukin an sang fal mek.

Bundesliga lamah Dort-mund-in beisei an phak rih lo a, goal khung lamah harsatna an neih loh viau laiin holam takin an chak lo fo. League-ah goal 31 khung tawhin anni aia khung tam an awm rih lo a, goal 15 chhuah tawhin ṭum thum an tlawm tawh thung. Thomas Tuchel-a naute hian Legia Warsaw 8-4 a an hneh hnuah Eintracht chu 2-1 in an hneh lo zui thung, kartawp an match hnuhnung berah erawh Mon-chengladbach 4-1 in an sawp.

Dortmund hian tun lai khawvel striker hriam berte zinga mi Aubameyang an kawl. Gabon international hian tun season-ah a club tan inelna hrang hrangah goal 18 a khung tawh a, thlamuanpui tham a ni. Ani bakah hian Marco Reus an la nei cheu - Germany international hi hun rei tak hliam vanga a chawlh hnuah tun hnaiah a lo kir a, kartawp khan tun season-a a vawi khat nan Bundesliga match-ah inkhel bul ṭanin a ṭhiante khung tur vawi thum a siam sak, Real tlarhnung tan ven uluk a ngai ang.