Nadal-a'n beiseina nen season thar a thlir

Rafael Nadal chuan hliam vangin a duh aia hmain season khar mah se kum tharah chuan ṭha zawka a lo kir theih ngei a beisei thu a sawi chhuak.

Grand Slam vawi 14 cham-pion tawh Nadal hi kumin October thlaa khelh zawh tak Shanghai Masters-a a chak loh hnuah a tan season a tawp thu a sawi a, a banrek na enkawl chhunzawmin tunah chuan
ṭha takin a inkhel thei leh tawh.

Kum 31-a upa Nadal chuan, "Hringnunah hian engmah hi chiangsa a awm lo. Kei chuan ka hliam a dam hnuah ngawrh takin inbuatsaihna ka nei chhunzawm a, season thar lo awm turah hian beiseina ka nei sang hle," tiin a sawi.

Spanish tlangval Nadal hi season thara Grand Slam lo awm hmasa ber tur Australian Open inbuatsaih nan tun thla tawpa khelh tur Mubadala World Tennis Championship-ah inlan a tum thu a ti chiang tawh.

Nadal chuan sawi chhun-zawmin,"Tunah chuan thil tum pahnih ka nei. Nuamti tak leh ṭha taka khelh chhuah a ni. Chumi tur chuan hriselna neih ṭhat a ngai a, nakkum January 16-a Australian Open kan khelh hunah chuan tun hma lam ka dinhmun ang kha ka neih leh hman ka beisei,"tiin a sawi.