FA Cup third round Club tenau tan hausakna remchang!
FA Cup third round-a team inhmachhawn tur puan a ni a, League Two club Newport County leh Plymouth Argyle inkhela chak zawkin Anfield-ah Liverpool an lenchilh dawn - club tenau tan club lian zawk tum hi sum siamna remchang a nih avangin League Two club-te hian Reds hmachhawn hi an chak zawk ang.
Premier League club zingah West Ham hmabak a hautak dawn a, league lama beisei phak lo Hammers hian Manchester City an mikhual dawn. Champions League lama last 16 lut tawh Leicester City chuan khualmualah Everton an hmachhawn dawn a, an hmabak a awlsam dawn lo.
Champion lai Manchester United defender hlui Jaap Stam chu Premier League nomawi pathum leh Champions League nomawi a lo chawi tawhna Old Trafford-ah a kir dawn. Netherlands international hlui hian Championship club Reading a enkawl mek a, United nen an inhmachhawn dawn.
Sum siamna
Anfield-a lenglut thei dinhmunah Newport an ding a, huphurh a hnekin an phur hle! Fans ho enkawlna hnuaia awm mek club chairman Gavin Foxall chuan, "Anfield-a lenluh hi keini ang club tan chuan kan sum bawm ti puar nawlh thei tur a ni a, club tenau tan chuan Anfield-a kan inkhela sum hmuh hi a tlem berah season khat emaw season hnih chhung inenkawl nan kan hmang thei dawn a ni," a ti.
Gavin Foxall chuan sawi chhunzawmin, "Anfield-a Liverpool kan hmachhawn thei a nih chuan kan club chan-chinah hriat reng turin a awm tawh ang," tiin a sawi.
Preston vanneihna
Liverpool khingpui tur a la chian theih loh laiin club tenau zingah Preston North End chu an hausak belh dawn tih a chiang tawh - Championship club hian kum 2014 leh 2015 champion Arsenal an mikhual dawn.
Preston manager Simon Grayson chuan, "Arsenal mikhual hi kan club tan a ṭha a ni. Kan khelmuala inkhel tur kan nih avangin kan fan-te tan tun hi world class player hmuhna remchang a ni a, tuna Arsenal squad tluka mikhual chakawm hi an awm chuang lo," tiin an huphurhna aiin an phurna a lian zawk.
Hei le Stam
Kum 1999-ah Manchester United chu treble champion an ni a, United tan tlarhnunga an ban rinawm chu Jaap Stam a ni. Dutch defender hian coach a nih hnuah United a luhkhung dawn.
Stam nen United tana khel dun ṭhin Andy Cole chuan, "En a chakawm tawh khawp mai. Stam hian Reading-ah hna ṭha tak a thawk a, ka lawmpui em em a ni," a ti. AC Milan tan pawha khel tawh defender hian Championship table lamah Reading hi pathumna dinhmun a luahpui mek.
Club tenau
Tun dinhmuna FA Cup-a beisei la nei zinga division hniam ber chu seventh tier-a khel mek Stourbridge United an ni. Northern Premier League Premier Division-a khel mek club hian Northampton Town an hneh thei a nih chuan League Two club Wycombe Wanderers chu an lenchilh ang.
Non-league club zingah Barrow chuan League One club Rochdale A.F.C. an mikhual dawn a, Halifax leh Eastleigh intuma chak zawkin Championship club Brentford F.C an lenchilh dawn bawk. Barrow manager Paul Cox chuan, "Kan khelmualah kan inkhelh dawn avangin kan manager chu a lawm ngawt ang," tiin a sawi.
FA Cup Third Round Fixtures
Chelsea Vs Peterborough/ Notts County
Liverpool Vs Newport/Plymouth
Preston Vs Arsenal
West Ham Vs Manchester City
Tottenham Vs Aston Villa
Manchester Utd Vs Reading
Everton Vs Leicester
West Brom Vs Derby County
Ipswich Vs Lincoln
Sunderland Vs Burnley
Millwall Vs Bournemouth
Brighton Vs MK Dons/Charlton
Wigan Vs Nottm Forest
Watford Vs Burton Albion
Cardiff Vs Fulham
Cambridge Utd Vs Leeds
Huddersfield Vs Port Vale
Brentford Vs Halifax/Eastleigh
Norwich Vs Southampton
Accrington Vs Luton
Barrow Vs Rochdale
Hull Vs Swansea
QPR Vs Blackburn
Blackpool Vs Barnsley
Birmingham Vs Newcastle
Middlesbrough Vs Sheff Weds
Wycombe Vs Northampton/ Stourbridge
Stoke Vs Wolves
Bristol City Vs Shrewsbury/Fleetwood
Bolton Vs Crystal Palace
Sutton Utd Vs AFC Wimbledon
Rotherham Vs Oxford/Macclesfield