Hull-in puitu kan ngai - Davies

Hull City defender Curtis Da-vies chuan Premier League aṭanga an tlak thlak mai loh nan an club chuan insiam ṭhat an mamawh thu leh hma an sawn theih nan puitu an mamawh thu a sawi chhuak.

Thawhṭanni zan khan Premier League inkhel pakhat a awm a, midfielder Gaston Ramirez-a goal hmangin Middlesbrough chuan an mikhual Hull 1-0 in an hneh.

Season ṭan dawn khan Hull hian inkhel turin player chhawr theih 13 chiah an nei a, transfer tawp hma ni hnihah hnawhsarum takin player player paruk an lalut. Tun hnai an league match hnuhnung 10-ah vawi riat ngawt an chak lo a, table-ah 19-na niin a mawngphaha awm Swansea City nen an inthlauhna chu point hnih chiah a ni.

Davies chuan, "Kan player tharte hian an theihtawp chu an chhuah ngei a, mah se manager Mike Phelan tan anni chher hriam turin hun a tam tawk lo," tiin an team an inman tawk loh chhan nia a hriat a sawi.

Season kal mekah Tigers (Hull sawina) hian goal 11 chiah an la khung a, club 20 zingah anni aia khung tlem an awm lo! Hetihlai hian Boro erawh an sang zel. Aitor Karanka naute hi an match hnuhnung parukah vawi khat chiah an tlawm a, league table-ah 13-naah an invawrh chho tawh.

Boro manager Karanka chuan, "Point 15 kan nei ta a, tla hniam lo tur chuan kan hmuh belh zel a ngai. Kai thar kan nih avangin thil a awlsam lo a, kan tumram kan la thlen loh avangin kan thawhrim chhunzawm a ṭul," tiin a sawi.