Best forward nominee player panga Sawmfela Apuia Michael Danmawia Dampuia

Mizoram Premier League Season 5 best forward chawimawina dawng thei tura player panga chhawpchhuah te goal khung tawh zat belhkhawm chu goal 38 a ni.

Best forward nominee-ah Chanmari West FC-in Laldampuia leh R. Laldanmawia te an thawh a; Bethlehem Vengthlang forward Lalrammuanpuia (Apuia), Chanmari for-ward Malsawmfela leh Dinthar forward Michael Lalremruata-te hming a lang bawk.

Sawmfela double?

MPL ṭan kumin Mizoram Police forward F. Lalrinpuia chu best forward atan thlan a ni a, season liam ta khan Republic Veng tlangval Valpuia hi Aizawl FC tan khelin best forward, best player leh top scorer chawimawina a hui vek bawk.

MPL2-ah Chanmari FC forward MS Dawngliana chuan best forward chawimawina a dawng a, Bawngkawn tlangval hi MPL1-ah top scorer a ni. Tun season-ah Dawngtea hi Chhinga Veng tan a khel a, inhliam vanga a inlan tam loh avangin nominee-ah a tel pha lo.

Kumin nominee-a tel zingah Mal-sawmfela chiah MPL best forward chawi-mawina dawng tawh a awm a, Ramhlun South tlangval hi MPL3-ah best forward a ni. Sawmfela hian chawimawina a dawng nawn a nih chuan Valpuia hnua best forward chawimawina vawi hnih dawng thei hmasa ber a ni ang.

Nominee te chu :

Laldampuia, Chanmari West

Kawrtethawveng tlangval Laldam-puia'n goal 11 a khung tawh a, Chanmari West captain hi man of the match-ah vawi nga thlan ni tawhin tun season-a player hmuhnawm ber ang hiala chhal theih a ni.

Dampuia goal 11 khung zinga goal kua hi a ke dinglama a khung a ni a, a kei vei lam leh a lu hmangin goal khat ve ve a khung bawk. West Warrior forward hi minute 119 danah goal khat zel a khung a, match hnuhnung pathumah a zawnin goal a khung a, Ningani zana BVT lama goal a khung a nih chuan tun season-ah a zawna vawi li khung hmasa ber a ni ang.

Chanmari West captain Dampuia hi MPL2-ah Dinthar tan a inziak lut a, MPL champion hmasa ber tan hian season hnih khelin goal nga a khung. MPL4-ah Aizawl FC tan Dampuia hian goal hnih a khung a, tun season-ah MPL season thum chhunga a goal khung aiin goal liin a khung tam tawh zawk.

Lalrammuanpuia (Apuia), BVT

Armed Veng South tlangval Lalram-muanpuia'n goal nga a khung tawh a, Bethlehem VT tana goal khung tam ber a ni. Apuia hian Phase 1-a Aizawl FC, Dinthar FC leh Chhinga Veng te an hmachhawn ṭumin match zawnin a pet goal a, chakna goal a ni vek bawk.

BVT forward Apuia hi man of the match-ah vawi hnih thlan a ni tawh a, semifinal-ah Chanmari West lamah goal khungin tun season-ah minute 223 dana goal khat zel a khung. Armed Veng South tlangval hian penalty aṭangin goal khat a khung tawh a, goal nga khung tur hian a ke dinglam vawi thum hmangin a ke vei lam leh a lu vawi khat ve ve a hmang bawk.

2015 NECS Cup-ah Apuia hi Armed Veng South tan khelin top scorer a ni a, MPL club Chanmari West zawmin goal khat chiah a khung. Tun season-ah erawh BVT-ah insawnin goal khung thei bik player a nihzia a pholang chho mek.

Malsawmfela, Chanmari FC

MPL3 best forward Malsawmfela'n tun season-ah goal 10 a khung tawh a, Chanmari FC forward hi MPL tihmuhnawmtu pakhat niin MPL5-a goal 100-na khungtu a ni.

Ramhlun South tlangval hian penalty aṭangin goal li a khung tawh a, goal 10 khung tur hian a ke dinglam vawi kua hmangin a ke vei lam vawi khat a hmang bawk. Sawmfela hian MPL5-ah minute 124 danah goal a khung.

Sawmfela hi MPL2-ah Aizawl FC tan khelin goal thum a khung. MPL3 aṭangin Chanmari FC-ah insawnin goal hmaah a hriam sawt a, goal kua khung nghalin season liam ta khan goal ruk a khung leh bawk. MPL-ah Sawmfela'n goal 28 a khung tawh.

Michael Lalremruata, Aizawl FC

Michael Lalremruata'n zuih ral lam a la pan lo tih lantirin tun season-ah Dinthar FC tan MPL-a a season ṭha ber a hmang. Khatla tlangval hian MPL5-ah goal riat a khung a, minute 129 danah goal khat a khung.

Michael-a hian goal riat khung nan a lu vawi thum a hmang a, a kei dinglam vawi li hmangin a kut vawi khat a hmang bawk. Khatla tlangval hian a club hlui Aizawl FC lamah second 46-na lekah goal a khung bawk a, hei hi tun season-a goal rang ber a ni.

Khatla tlangval Michael hi Mizo striker ṭha zinga sawi reng ni ṭhin mah se season hnuhnung pahnihah goal a khung lo a, a larchhuahna Aizawl FC-in an chhuahna chhanah a ngaih theih bawk. Amaherawhchu Michael hian MPL1-ah goal li khungin AFC bika top scorer a ni a, MPL2-ah goal thum khungin AFC tan Khatla tlangval aia khung tam an awm lo.

R. Laldanmawia, Chanmari West

MPL1 best player R. Laldanmawia hi tun season-a hattrick siam hmasa ber a ni. West Warrior forward Danmawia hian a club hlui Dinthar FC an hneh ṭumin hattrick a siam a, he inkhel aṭang hian Chanmari West-in harhtharna an chang chiah bawk.

Sialhawk tlangval Danmawia hian tun season-a goal li khung turin a ke dinglam vawi thum a hmang a, a ke vei lam vawi khat a hmang bawk. Chanmari West forward hian minute 332 danah goal a khung a, goal a khung ṭha tawk loah ngaih theih mah se vawi li lai assist a neih avangin season ṭha tak a hmangah a ngaih theih.

Danmawia hian MPL1-ah goal kua a khung a, MPL2-ah goal sarih khung lehin MPL3-ah goal nga a khung. MPL4-ah Chanmari FC zawmin goal nga a khung sak a, MPL-a goal a khung tawh zat chu goal 30 a ni.

Best Forward Nominee

1 Laldampuia Chanmari West

2 Lalrammuanpuia (Apuia) Bethlehem VT

3 Malsawmfela Chanmari FC

4 Michael Lalremruata Dinthar FC

5 R. Laldanmawia Chanmari West