City leh Chelsea hrem dawn

Football Association chuan Manchester City leh Chelsea chu inkhelh laia an player-te an thunun zawh loh avangin thubuai an siamsak a, club pahnih hian December 8 thleng an thubuai khinletna hun an nei ang.

Inrinni zan khan team pahnih hi inhmachhawnin City hian 3-1 in hnehna an chang a, injury time minute 95-naah buaina hi chhuakin City forward Sergio Aguero leh midfielder Fernandinho chu hnawhchhuah niin he buainaa inrawlh Chelsea midfielder Cesc Fabregas chu hremna engmah pek a ni lo thung.

Tun season-a tharum hmanga an khingpui player laka a chet avanga vawi hnih hnawhchhuah tawk tawh Aguero hi David Luiz laka a chet dan avangin match li khel thei lo turin hrem a ni a, Aguero foul hnu lawka Fabregas nena intibuai Fernandinho chu match thum khel thei lo tura hrem a ni bawk.

City manager Pep hian a naute chet dan avang hian ngaihdam lo dil tawhin, "Thil thleng avang khan ngaihdam ka dil a, Aguero khan Luiz kha tih nat luih a tum lo tih ka hria a, Fernandinho khan Aguero chhan kha a tum a ni," tiin a naute chet dan chungchang a lo sawi tawh.

Hetihlai hian FA chuan Watford leh West Brom chu player thunun zawh loh vang thoin thubuai an siamsak ve bawk. Inrinni zana an inhmachhawn
ṭum-a buaina siam club pa-hnih hi December 8 thleng an thubuai khinletna hun pek an ni ve bawk.