Copa Sudamericana champion Chapecoense

South American football con-federation (CONMEBOL) chuan an chuanna thlawh-theihna chetsual vanga Copa Sudameri-cana final khel thei lo Brazilian club Chapecoense chu Europa League tlukpui inelnaah hian champion no-mawi an hlan thu an puang.

Karhmasa Thawhṭanni khan Chapecoense-te hi Copa Sudamericana final-a Colombian club Atletico Nacional hma-chhawn turin an zin chhuak a, mah se an inkhelhna tur khawpui Medellin ṭum hmun an thlen hmaa chesualin player 22 zinga 19 zetin an nunna an chan a ni.

Chapecoense chetsual hnu lawka an khingpui club hi champion-a puang tura CON-MEBOL hnena ngentu Atletico Nacional chu Fair Play award pek an ni. Champion-a puan tak Chapecoense hian lawmman atan pound maktaduai 1.57 an dawng a, Nacional hnen-ah hian £787,000 pek a ni thung.

Brazilian club Chapecoense vice-president Ivan Tozzo chuan, "Chape khan final khel thei ta ila kan champion ang tih ka chiang a, he nomawi hi kan player-te thlah nan chuan duhthusam a ni," a ti a, CONMEBOL thutlukna chu thutlukna dik tak a nih thu a sawi bawk.

Chape dinhmun

Inrinni khan mi nuai hnih chuang awrh awmna khawpui leh Chapecoense innghahna ni bawk Chapeco khawpui chuan an player leh coach nunna chan ta te hriatrengna hun an hmang a, nunna chan te kuang hi club colour a hring leh a vara tuam a ni.

Khawvel hmun hrang hranga club ten inkhelh dawn apiangin Chapecoense player thi ta te sunna hun an hmang a, tun kar Champions leh Europa League inkhelah te pawh he hun hi hman a ni. Brazilian club lian te chuan an club squad player zawng zawng deuhthaw chantu club hi an player te pawisa chawi ngai loa a thlawna an hawhtir theih tur thu an sawi a, season thum chhung chu relegate thei lo se an duh thu an sawi bawk.

Chapecoense hi December 11 khian an league match hnuhnung ber khel tur an ni a, mah se an inkhel tur hian champion emaw relegation lamah nghawng a neih dawn loh avangin ṭhulh a ni.

Hmabak

Copa Sudamericana cham-pion-ah Chapecoense puan an ni a, Brazilian club hian season tharah South American Champions League Copa Liber-tadores an khel dawn. Hei mai a ni lo, Copa Sudamericana final-a an hmachhawn theih tak loh Atletico Nacional nen Recopa Sudamericana an khel dawn.

Recopa Sudamericana hi Europe-a UEFA Super Cup tlukpui a ni a, Copa Libertadores leh Copa Sudamericana champion-in an khel ṭhin. Copa Libertadores hi February - July inkarah khelh a ni a, Atletico Nacional hi Colombian league champion an nih avanga inlanin an champion.

Colombian Cup champion-in August - December inkara khelh ṭhin Copa Sudamericana an khel ṭhin a, Atletico Nacional hi an ram Cup champion an nih tho avangin Sudamericana-ah an inlan a, Copa Libertadores ang thoin final lut mah se Chape chhiat tawhna avangin Brazilian club hi an nomawi chu an kian a ni.

Chape-ah Gudjohnsen?

Barcelona forward hlui Ro-nal-dinho leh Argentina international hlui Juan Roman Riquelme te chuan Chape chuan an mamawh a nih chuan football an chawlhsan tawhna aṭanga kira Brazilian club tan hlawh nei loa an khelh theih thu an sawi a, Iceland legend Eidur Gudjohnsen chuan Chape tana khelh a hnial loh thu a puang ve leh ta.

Indian Super League-a Pune City-in an lakluh, hliam vanga inlan leh thei ta lo striker chuan, "Chape hian min duh a nih phawt chuan an club tan ka khel thei ang. Ronaldinho kianga khelh leh pawh a chakawm alawm," tiin twitter-ah a ziak a, Barcelona tana a khelhpui ṭhin Brazilian player ropui nen khelhdun leh a chak thu a sawi tel nghal.