Chak lo mah se India an tlang

Badminton Asia Team Championships 2020 khelh laiah Ningani zan khan India chu Malaysia lakah 4-1 in an chak lo, chak lo mah se India hian quarterfinal an lut tho. Nizan khan Thailand nen semifinal luh an inchuh leh a, he thu buatsaih lai hian result kan hre hman lo.

India tan hian Kidambi Srikanth chuan singles huangah hnehna a chang, world number 1 hlui bak hi Indian player zingah hnehna chang an awm lo. World number 11 B Sai Praneeth leh HS Prannoy te chuan an khingpui an hneh lo a ni.

An match hmasa zawkah India hian Kazakhstan 4-1 in an hneh tawh, group B-a team pathum awm zingah Kazakhstan hian hneh an neih ve loh avangin India hian knockout stage an luh theih phah.