Hneh loh nei lo Arsenal an chungnung

Champions League Group A hmahruaitu ni turin Arsenal-in hneh loh an tawng lo. Thawhlehni zan khan Gunners hian Lucas Perez-a hattrick hmangin FC Basel 4-1 in an luhchhuah a, inkhel dangah Paris St-Germain chu an mikhual Ludogorets Razgrad nen 2-2 a an inhnehtawk avangin Arsene Wenger-a naute hi group hmahruaitu an ni.

St. Jakob Park-a inkhelah Gunners hian minute riatna lekah Perez hmangin goal an khung ṭan. Kum 28-a upa hian minute 16 leh 47-naah goal khung chhunzawmin a club thar tana a hattrick hmasa ber a siam a, an goal lina hi Mesut Ozil thawhrah sengtu Alex Iwobi khung a ni - hun tawp dawna Seydou Doumbia goal khungin Swiss club mualpho tur a hliahkhuh zo tawh chuang lo.

Spanish striker Perez hi Arsenal tan Champions League-a hattrick siam thei parukna chiah a ni a, tun hmain Thierry Henry, Nicklas Bendtner, Danny Welbeck, Olivier Giroud leh Ozil ten hetiang dinhmun hi an lo tawng tawh.

Kum 2005-06 season khan Arsenal hian group stage-ah hneh loh nei loin last 16 an lo lut tawh a, hemi hnuah tun
ṭum hi chak loh neih loa an tlang lehna hmasa ber a ni. Tun hnai kum ruk chhunga quarterfinal lut zo tawh lo Gunners hian group danga hmahruaitu an hmachhawn dawn rih loh avangin beiseina an nei sang ang.

Arsenal manager Wenger chuan, "Goal khung turin hun ṭha tam tak kan insiam thei a, a hmawr bawk turin Perez a lo awm zel bawk. Ka nauten inpumpekna nen an khelh avangin kan duhthusam a thleng dik," tiin a sawi.

Wenger chuan sawi chhun-zawmin, "Ludugorets khan kan tan hna ropui tak min thawh sak a, kan duh dan takin thil a kal thei a ni. Hmahruaitu kan nih avangin knock out stage-ah kan khingpui a awlsam dawn tihna a ni lo, group ṭhenkhatah chuan hmahruaitu aiin pahnihna an
ṭha zawk! Keini chuan kan hna kan hlen tawh a, enge lo thleng dawn tih chu kan hre zel ang," tiin eng team pawh hmachhawn tura inpeih a ṭul thu a sawi.

Group A inkhel dangah PSG chuan vawi hnih goal an phurh hnuah an sut leh hram zel a, a tawpa an mualpho lohna chu Angel di Maria a ni. Paris-a inkhelah rin loh takin mikhual Ludogorets an huangtau hle. An khelmuala 3-1 a an ngam loh lakah Virgil Misidjan (15') leh Wanderson (69') hmangin goal an khung.

PSG manager Unai Emery-a'n inkhelh ṭan hmain hnehna chan ngei a duh thu sawi mah se beisei angin thil a kal lo. Edinson Cavani-a'n minute 61-naah an si phurh sut ve mah se goal an chhuah leh hnuah an thochhuak mai thei lo a, point khat hlawh chhuak turin hun pek belha Di Maria goal an mamawh.