Manchester City ngam loh Dominic Solanke

Manchester City an tawlhthlu leh ta - Tottenham Hotspur laka 2-0 a hma an hruai hnuah ngam loh val Dominic Solanke an tawng a, English striker hian Spurs tan goal hnih khungin, an si phurh a sut zo.

Hun a tawp meuh chuan 2-2 in team pahnih an inhnehtawk a, City tan Premier League nomawi a hla leh ta sawt. Pep Guardiola naute hian hmahruaitu Arsenal chu point ruk ngawtin an phak ta lo.

Pathianni zan inkhelah hian City tan Rayan Cherki leh Antoine Semenyo ten first half chhungin goal khat ve ve an khung a, Manchester khaw club hi harsatna tawk loa chak zui mai tura ngaih an ni.

Mahse, beisei angin thil a kal vek lo. Solanke-a'n second half-ah Spurs tan goal hnih khungin, si phurh a sut zo a, a goal hnihna phei chu goal mawi bik a ni - point khat an hlawh chhuak.

City ta!

Spurs khelmualah City-in inkhel an thunun a, Cherki chuan minute 11-na lekah goal hmahruai a khung - Spurs tlarhnungin an tih tur an titawk lo a, Cherki tan hun ṭha an siamsak.

London club-in 'comeback' hmel an pu lo a, si phurh an sut thei ang em, tih ai chuan goal eng zat nge an phur belh ang? tih chu zawhna awm zawk a ni a, mualneitu an khel chhe takzet.

First half tawp nan minute khat chiah a awm tawh tihah Spurs an chesual zui. Defender Radu Dragusin-a ball petchhuah chhe tak chu Rodri-a'n a chang a, Bernardo Silva tan a pe.

Portuguese midfielder hian Semenyo a pe ve leh a, thlasik transfer-a City zawmtu forward hian goal-ah a chantir - Ghana international hian City a pan hnuah match nga khelin goal li a khung tawh.

Thawnthu danglam

Cuty-in first half-ah inkhel an thunun a, chawlhlawk hman zawh hnuah erawh thawnthu a inher danglam ta dawrh - chawlhlawk ruala an fan-te ngeiin nasa taka an au el Spurs-in tlawm an tum lo.

First half-a hna nei tlem tak, City keeper Gianluigi Donnarumma tan hna a awm ṭan a, Destiny Udogie khung ngei tur nia lang a dansakte chu pui tak a ni.

Mahse, tah hian a tawp mai lo - minute 53-naah City tlarhnung chaih phar chungin Solanke-a'n si phurh a sut ṭhen a, City lamin goal a khung hma hian Marc Guehi lakah a foul niin an ngai a, an lungawi lo hle.

Mahse, hetah hian a la tawp mai lo cheu - minute 70-naa Conor Gallagher-a siamsak chu Solanke chuan 'scorpion kick' hmangin goal-ah a chantir a, Italian keeper ṭha Donnarumma-a'n tih theih a nei lo.

Hello Solanke

Solanke-a'n goal hnih a khung a ni mai lo - goal mawi bik a khung tel a, a team tan City lakah point khat a hlawh chhuak tel bawk. Mahse, hun pek belhah hliam vangin Solanke lakchhuah a ngai.

Spurs boss Thomas Frank chuan, "Solanke khan tlan harsa a ti a, minute 90 khelh hi chu a tan a la harsa rih tih kan hria. Mahse, kan mamawh ve bawk a ni," a ti a, thla ruk zet hliam vanga chawl a striker a la dam chian loh thu a sawi.

Frank chuan sawi zawmin, "City hi Haaland tel loin thla ruk khelh ngai se tiin ngaihtuah ve mah teh u. Hliam hian min tibuai takzet a ni," a ti a, an result ṭha lo ṭhin a sawifiah.

City hian Nilaini zanah League Cup semifinal second leg khelin Newcastle United an mikhual zui dawn a, kartawpah Liverpool an lenchilh bawk ang - Pep leh a naute tan EPL nomawi a hla zel.