Zanin dar 7:30-ah WPL playoff

Women's Premier League-ah zanin dar 7:30 hian Gujarat Giants leh Delhi Capitals ten playoff an khel dawn. Final hi February 5, Ningani zanah khelh a ni dawn a, playoff-a chak zawk hian Royal Challengers Bengaluru nen nomawi an inchuh ang.

WPL hi kum 2023 aṭanga khelh ṭan kha ni a, Mumbai Indians chu champion hmasa ber an nih bakah champion lai an ni bawk. Kum 2024 khan tun ṭuma final in vaw thleng tawh RCB hian nomawi an chawi tawh bawk.

Kumin inelnaah hian team panga RCB, Gujarat Titans, Delhi Capitals, Mumbai INdians leh UP Warriorz te an tel a, vawi hnih ṭheuh an inkhelh chhuah hnuah a sang ber RCB-in final an lut nghal. Playoff khel tur Gujarat Giants leh Delhi Capitals te hi pahnihna leh pathumnaah an awm. Vawi hnih champion tawh Mumbai erawh palinaah an awm avangin beisei tur an nei tawh lo.

Hmeichhe cricket inelnaah pawh sum chevel a tam hle. World Cup-a India champion puitu zinga mi all rounder Deepti Sharma chu UP Worriorz-in nuai 320-in an lei a, Kristian nula Jemimah Rodrigues pawh cheng nuai 220 man niin Delhi Capitals tan a khel. Mipa inelna Indian Premier League ang thoin player lilamna neih a ni a, lilam bul ṭanna hi nuai 10 aṭanga nuai 50 inkar a ni hlawm.

Final hi Vadodara, Gujarat-ah khelh a ni dawn a, BCCI-in an hnuaia association tin President leh Secretary te a sawm angin Cricket Association of Mizoram aṭangin president Robert Lalfamkima leh hony. secretary Lalfakawma Varte ten a hmuhah an en ang.