Zaninah D League semifinal

Mizoram Basketball Association (MBBA) buatsaih D League inelna semifinal chu zanin hian Hawla Indoor Stadium-ah khelh a ni dawn. Zanin dar 6:00-ah Chaltlang BC leh Chawnpui BC te an inkhel ang a, dar 8:00-ah Vanguard BC leh OPD Venghlui te an inkhel zui ang.

D League-ah hian team pariat an awm a, vawi khat ṭheuh an inkhelh chhuah hnuah Chaltlang BC, Vanguard BC, OPD Venghlui leh Chawnpui BC te a sang paliah awmin champion tur an zawng dawn. EBBC, Nursery SC, Champhai Boars leh Champhai Vengthlang te erawh a hnuai lamah an awm a, beisei tur an nei tawh lo.

Semifinal-a chak zawk hian final an luh dawn bakah nakkumah Mizoram Premier League an khel dawn. Final hi February 5, Ningani zanah khelh a ni ang. D League rual hian hmeichhe inelna kalpui a ni bawk a, team pathum LB Associates, Hotshots leh Team Alpha te telin Ningani zan hian LB Associates leh Hotshots ten final an khel ve bawk ang.

Semifinal - Zanin Inkhel
Chaltlang BC 6:00 PM Chawnpui BC
Vanguard BC 8:00 PM OPD Venghlui