A zawna vawi thum chak United

Manchester United-in Ruben Amorim hnuaiah khan a zawna vawi thum chak turin match 37 an mamawh a, Michael Carrick hnuaiah erawh match thum chiah an mamawh. Portuguese manager-in United din ṭha leh turin hun rei nghah a la ngaih thu a sawi a, Carrick hnuaiah erawh club lian dang an el tawk nghal.

Fulham an hneh zawhah Carrick chuan, "A boruak kha a nuam danglam hle. Hetiang boruak nuam tak ka tawng ve thei hi ka lawm a, Stretford End hmaa ka awm khan a nawmna a belhchhah. Hnehna chan hi a awlsam reng thei lo a, tun aia nuam sa zawka chak pawh kan duh. Mahse, ka duh ang lo deuha kan han chak te hian a nuam danglam a ni," tiin an chak dan chungchang a sawi.

Carrick hnuaiah Man United siam tharin an awm a, tun hnaia an player lakluhten an theihna sang tak an pholang zel. Patrick Dorgu leh Bryan Mbeumo ten an man a phu zia an lantir hnuah Matheus Cunha leh Benjamin Sesko te an rawn inlar leh a, Carrick chauh ni loin player laluttu club hotu lam pawh an lawm ang.

Chutihrualin tun season tawpa chhuak tur Casemiro hmun ruak a zau dawn tih a lang a, Brazilian midfielder hian Old Trafford-ah a ṭha thei ang bera hun tawp hman a duh dawn. Man United hian February 7, Inrinni zan dar 6:00-ah Tottenham Hotspur an mikhual dawn a, Spurs hi Europa League final-a an hneh loh bakah an match hnuhnung berah an inhnehtawk. Thomas Frank-a hote hian Manchester City an chelh thei a, Carrick-a hote tan chak zel a harsa dawn.