Hmahruaitu Inter Milan an vul

Inter Milan chuan Pathianni zan khan 2-0 in Cremonese chu an khelmualah an luhchhuah a, Inter tan Lautaro Matrinez leh Piotr Zielinski ten goal an khung a, Cremonese-in a chhanletna an nei thei lo.

Stadio Giovanni Zini, Cremona-a inkhelah mikhual team Inter-in inkhel an thunun tluan zak a, mualneitu Cremonese an bet. Inter tan minute 16-naah Martinez-a'n Federico Di Marco corner pet chu a tauh lut a, Inter-in hma an hruai.

Argentine forward Martinez hi feet 5 leh inches kua chauha sang ni mah se, ball kangah a duai bik lohzia tilangin a tauh goal ṭha hle. Martinez hian tun season Serie A-ah goal 12 a khunga chiah a ni a, a ni aia khung hnem an awm lo.

Minute 31-naah Polish midfielder Piotr Zielinski-a'n box pawn aṭangin kawh takin a pet goal a, Cremonese keeper Emil Audero tan dan ngaihna a awm lo.

Second half-ah Inter-in inkhel thunun chungin goal an khung belh thei lo a, Cristian Chivu naute vanneih zan a ni lo. Mualneitu Cremonese pawhin an chance neih an chhawr ṭangkai thei lo. Tlarhma lama an innghahna Jamie Vardy leh Federico Bonazzoli ten goal an keng tel lo a, goal dang lut loin inkhel a tawp.

Inter hian point 55 hmuin hmahruaitu an nih chhunzawm zel a, an hmelma AC Milan-in point sarihin an phak lo mek. Milan hian zaninah Bologna an tlawh dawn a, an result a zirin an inthlauhna hi a danglam leh thei thung.

Inkhel dangah Juventus chuan an 4-1 in khualmualah Parma an hneh a, Turin club tan Gleison Bremer-a'n goal hnih a khung bakah Weston McKennie leh Jonathan David ten goal khat ve ve an khung a, Juventus defender Andrea Cambiaso-a'n an lamah tilut mah se Parma tan awmzia a nei pha lo. Juve hian point 45 hmuin palinaah an awm a, nizan inkhelah Roma-in Udinese an hneh chuan panganaah an awm leh ang.