Villa-in player 10-a khel Bees hneh lo

Aston Villa-in Premier League-a pahnihna nih theihna hun ṭha an bawhpelh a, Pathianni zan khan Brentford mikhualin 1-0 in an hneh lo. Bees winger Kevin Schade chu minute 42-naah hnawhchhuah ni mah se first half injury time-a Dango Ouattara goal hmangin hnehna an chang ta tho. Villa erawh an muala point an hmuh loh avangin hmahruaitu Arsenal aiin palina Manchester United nen an inhnaih tawh zawk.

Unai Emery-a'n January transfer-a a lakluh Tammy Abraham bul a ṭantir nghal a, English striker hian chance ṭha nei nghal mah se Bees keeper Caoimhin Kelleher-a'n a dansak. Bees lam pawhin chance an nei a, Schade-a'n goalkeeper Emi Martinez tihsual goal khung nan a hmang thei lo.

German winger Schade hian ṭul lo zeta Matty Cash a tlawh luih avangin minute 42-naah hnawhchhuah a ni a, Bees hi tlem zawk mah se goal an khung hmasa tho. Kum 23 mi Ouattara-a'n a cross ball an tih per chu chang lehin six yard box pawn chiah aṭangin kawh zetin a pet lut.

Injury time-ah Villa-in goal khungna chance an nei lehnghal a, halftime-ah Unai Emery-a'n a naute fuih ṭha leh bawkin second half-ah an goal bawh a na takzet. Second half ṭantirhah Tammy Abraham hmangin siphurh an sutah an inngai a, mah se VAR hmanga en let hnuah touchline pawnah goal a lo chhuah hman avangin pawm a ni lo.

Brentford keeper Kelleher-a'n hna a ngah a, Liverpool keeper hluiin a hna a tlin. Bees an ṭangtluan a, point thum hlu tak an hlawhchhuah avangin pasarihnaah an invawrh chho. Villa erawh pathumnaah an awm chhunzawm mah se club lian zawk Manchester United, Chelsea leh Liverpool ten an inkar an tih zim avangin season thara Champions League khelh phak pawh a harsa ang.