Lakers-in Knicks an ngam lo

NBA regular season khelh mekah Los Angeles Lakers chuan 112-100 in New York Knicks an hneh lo a, match khelh tur la tam mah se Lakers hi vawi 19 an chak lohna a nih avangin an result hi a lungawithlak loh.

Madison Square Garden, New York-a inkhelah Knicks tan OG Anunoby a langsar a, point 25 score-in rebound vawi riat a la bawk. Dan pangngaiin Jalen Brunson a ṭangkai a, American point guard hian point 12 leh assist 13 a nei a, Brunson bakah hian Josh Hart (20) leh Landry Shamet (23) ten Knicks chak nan an thawhhlawk bawk.

Luka Doncic-a'n Lakers tan point 30, assist 8 leh rebound vawi 15 la mah se a team chakpui nan a tawk zo lo a, Doncic hi season kal mekah points per game nei ṭha ber ni mah se a vanneih zan a ni lo. Veteran player Lebron James-a'n point 22 nei ve bawkin a la ṭangkai viau mah se a team a chakpui thei lo.

Chak lo mah se Lakers tan thu lawmawm a awm a, Austin Reaves chu Lakers match dawt leha Brooklyn Nets an tum hunah a inlan thei tawh dawn niin coach JJ Reddick chuan a sawi. American point guard Reaves hi nikum December-a Houston Rockets nen an inkhelh ṭumin a chawnah hliam a tuar a, Krismas hnuah inlan leh tawh loin thla khat dawn a chawl tawh. Reaves inlan leh hunah Lakers an ṭha leh sawt ang.