Kim loa khel PSG an chak

Paris Saint Germain-in Champions League-a an chak loh hnuah chetsual nawn an tum lo a, Achraf Hakimi-a'n red card hmu mah se 2-1 in Strasbourg an hneh tho. PSG tan Senny Mayulu leh Nuno Mendes-a'n goal khungin Strasbourg tan Guela Doue-a goal khung chu scoreline chei mawitu mai a ni.

Stade de la Meinau-a inkhelah PSG-in inkhel an thunun zawk a, goal khung hmasa zawkin minute 22-naah Mayulu-a'n Strasbourg defender Mamadou Sarr tihsual vangin hmahruaina goal a khung. Minute nga hnu lawkah Strasbourg tan Guela Doue-a'n an si phur a sut ve leh a, Strasbourg goal khungtu Guela Doue hi PSG winger Desire Doue unaupa a ni.

Second half-ah AFCON a khelh hnua lo kir Hakimi-a'n Strasbourg striker Joaquín Panichelli a tlawh avangin hnawhchhuah a ni a, kim loin PSG an khelh chhunzawm a ngai. Player kim loa an khelh hnuah pawh PSG an hlauhawm a, Nuno Mendes-a'n minute 81-naah goal khung lehin Luis Enrique hoten an huaisen rah hmuin 2-1 in an chak.

PSG hian point 48 hmuin hma an hruai chhunzawm zel a, anmahnin hnaih bertu RC Lens-in point hnihin an phak lo mek. Strasbourg erawh an manager Liam Rosenior-a'n Chelsea a pan hnuah a vawi khat nan an tlawm a, table-ah pasarihnaah awm mekin season tharah Europe inelnaa tel ve an inbeisei mek