Vietnam Grand Prix kaltlang pui theih beisei

China rama hri leng mek 'coronavirus' chuan infiamna khawvel pawh a nghawng a, April 19-a tlan tur Vietnam Grand Prix chu ṭhulh mai theih dinhmunah ding hman mah se Formula 1 managing director Ross Brawn chuan an kaltlang puih theih a beisei thu a sawi.

Vietnam Grand Prix an tlanna tur hi Hanoi a ni, he hmun hi China ramri aṭanga mel 100 vel chauha hla a ni. Tun dinhmun thleng chuan Vietnam ramah hian coronavirus kai mi 19 an awm tawh, ramri leh inkalpawhna laiah uluk taka invenna kalpui mek a ni bawk.

Brawn chuan, "Thurawn leh rawtna hrang hrang kan dawng reng a, tun thleng chuan Vietnam GP hi a hun pangngaiah neih theih beisei a ni, ram ṭhenkhat erawh a hun sawn a ngai dawn," a ti. Chinese GP chu a huna an neih theih dawn loh vanga an sawn tur thu an ti chiang tawh.