Gold paruk hlawhtu Mizoram

North East Ju-Jitsu Championship neih hmasak berah Mizoramin gold paruk leh bronze medal pathum an hlawh chhuak a, HMS Dawngzuala, Lalawmpuia, Lalhmangaihzuala leh Lalchhuanawmi ten gold hi an hlawh chhuak.

Ju-Jitsu hnuaiah hian fighting style chi thumah inelna awmin, Ne-Waza (Brazilian Jiu-Jitsu), Contact Fighting (MMA Rules) leh Fighting System (Semi Contact striking leh Grappling) te a ni.

Guwahati, Assam-a neih inelnaah Dawrpui tlangval HMS-a hi -77kg huangah inlanin, Ne Waza (BJJ) leh Contact Fighting (MMA) ah te gold a la a, Lalhmangaihzuala chuan Ne Waza leh Contact Fighting-ah tho gold a la bawk - Republic Veng tlangval hi -62kg ah a inlan thung.

Lengpui tlangval Lalawmpuia -69kg huangah inelna hmachhawnin, Ne Waza-ah gold lain, Contact Fighting-ah bronze medal a la thung a, Dawrpui Vengthar nula Lalchhuanawmi chuan -52kg huangah Fighting System (Semi-Contact) hmachhawnin, gold a la.

Chhuanawmi hian Ne Waza-ah bronze medal a la thung a, -56 kg huanga inelna hmachhawn tur Francis Lalremruata'n Contact Fighting (MMA) ah bronze medal a la thung.

January 31 - February 2 inkara neih inelnaah hian, Mizoramin coach atan One Championship hnuaia contract nei mek Nazareth Lalṭhazuala an hmang a, Zemabawk East tlangval kaihhruaina hnuaiah Mizoram team an che chhe lo.

JAM general secretary C. Lalrinpuia chuan JAM-in fighter-te mamawh chi hrang hrang a tum piah lamah, SPES Martial Arts Academy chuan an kal man a tumsak thu sawiin, lawmthu a sawi.