Championship lamah Kalvin Phillips a kal

Manchester City midfielder Kalvin Phillips chuan Etihad Stadium-a inkhelh loh reng ai chuan Championship club zawm a thlang a, kum 30 mi midfielder hian season tawp thleng loan-a khel turin Sheffield United a pan.

Premier League-a midfielder ngaihven hlawh pawl ni hman, English midfielder Kalvin Phillips hian tun season-ah City tan match khat chiah a la khel a, September-a Carabao Cup-a Huddersfield Town an hneh ṭum khan hun tawp lam minute sarih a inlan ve!

England tana vawi 31 inlan thei midfielder hian kum 2022 khan amah chher liantu Leeds United chhuahsanin City hi a zawm a, hetihlaia a man zat hi pound maktaduai 45 lai niin, kum ruk chhung atan contract a ziak.

Mahse, beisei ang vekin thil erawh a kal lo. City tan match 32 chiah khelin goal khat chiah a khung a, assist a nei miah lo! West Ham leh Ipswich Town-ah te loan-a kaltir a ni a, beisei a phak lo vek.

December 2022 khan Pep Guardiola chuan a player hi vantlang hriatah sawiselin, World Cup zawhah a rih tur ang aia rita a lo kir thu sawiin, "Training nei turin a inpeih lo," a ti thlawt.

Kalvin Phillips vanneihna erawh City a zawm kumah hian treble champion an ni a, Premier League, FA Cup leh Champions League-ah nomawi an chawi - season tluanin match 21 lai a khel ve a ni.