West Ham-ah Disasi a lut

Premier League club talbuai mek West Ham chuan Chelsea aṭangin defender Axel Disasi chu season tawp thleng an hnena khel turin, loan-in an la lut a, loan-a hawh manah pound maktaduai 1.7 an seng ve ang.

Disasi chuan, "He club zawm tura hun ṭha ka neih avangin ka lawm takzet. Theihtawp chhuah a, khelmual lut turin ka inpeih a ni," a ti a, Hammers-ah hmun chan tam a inbeisei.

France tana vawi nga inlan thei defender chuan sawi zawmin, "Chona phurawm tak a ni a, he club hi a awmna turah tak a awm lo tih kan hre vek. Mahse, he club ṭanpui a, a tum ram thlenpui turin ka lo kal a ni," a ti.

Kum 27 mi centre back hian Chelsea tan kum khat chuang a khel lo tawh a, head coach chhuak ta Enzo Maresca khan mamawh loa a inhriat avangin first team zingah training pawh a nei ve thei lo.

Disasi hian an ram club Paris FC aṭanga zinkawng zawh ṭanin, Ligue 1 club Reims leh AS Monaco tan pawh a lo khel tawh a, kum 2023 khan £38.5mtd-in Chelsea hi a zawm a, season hmasa tawp lam khan Aston Villa-ah loan-in a khel bawk.