Palace player man to ber Strand Larsen

Crystal Palace chuan an club player man to ber ni turin Wolverhampton Wanderers striker Jorgen Strand Larsen an la lut a, pound maktaduai 48 an inseng.

Kum 25 mi striker hian Selhurst Park-ah kum li leh a chanve khel turin contract a ziak a, jersey number 22 a ha ang. Palace chairman Steve Parish chuan, "Jorgen-a'n kan club zawm a thlang hi kan lawm hle a, Selhurst Park-a a inkhel en a châkawm tawh hle a ni," a ti.

Parish chuan sawi zawmin, "Kum lo kal zel turah kan tihsual lohzia min hmuh tir ka beisei," a ti - Palace hian Everton winger Dwight McNeil pawh lakluh tumin an hel a, mahse, lehkha pawimawh an tihfel hman loh avangin an inla lut ta lo.

Kum 25 mi Larsen hi striker ṭha pangngai tak ni mah se, tun season-a che chhe tak Wolves tan beisei a phak lo - season hmasa khan Wolves-ah hian loan-a khelin match 38-ah goal 14 a khung a, nipui transfer-ah khan a nghetin contract a ziak zui.

Mahse, tun season inelna hrang hrangah match 26 khelin goal ruk chiah a la khung a, EPL-ah phei chuan goal khat bak a la khung lo - season hmasa lama a 'form' a chhawm theih beiseiin Palace hian 'risk' an la a ni ber.

Strand Larsen chuan, "Palace ka zawm thei hi ka lawm hle. Hun rei tak chu he club zawm hi ka lo châk tawh a, club tiphur a, goal khung a, theihtawp chhuah turin ka lo kal a ni," a ti a, nipui laia Newcastle United-in £55mtd-a lei an tum striker hian Palace-ah hming chher a tum ang.