Electric Vengin MPL final an lut

Electric Vengin an club history-a a vawi khat nan Mizoram chhunga football inelna sang ber Mizoram Premier League Season 8 final an lut. I Day Football champion EFC hi Thawhlehni zan khan hun pangngaia Chhinga Veng nen 1-1 a an inhnehtawk hnuin penalty shootout-ah 4-3 in hnehna an chang.

Lalsangzuala Hmar-in season li chhungin club pathum a zawnin final a luhpui a, head coach nichungin nomawi pathumna a beisei mek. Electric Veng tan erawh kum ṭha a ni a, kumin hi an club kum 25-na niin I Day Football-ah an champion tawh a, MPL-ah an la thlen ngai loh final an thleng.

Electric Vengin season liam ta khan a vawi khat nan Mizo rawlthar talent nei ṭha Ramhlunchhunga an lalut a, MPL club hian Kolasib rawlthar hi a pumrua a len loh avangin an hmuhtirh chuan rinhlelhnain an khat. Season hmasa berah goal khat pawh khung lo mah se season hnihnaah Chhunga'n a theihna a pholang a, MPL winger hmuhnawm ber zinga mi a ni mek.

Semifinal inkhel pawimawh takah Chhunga hian minute lina lekah Chhinga Veng lamah goal pawimawh a khung a, winger ṭha tih tur ang thlapin a pet thiam lam a ke dinglam ven sak mah se a ke vei lamin a pet goal. Tun season MPL-ah goal nga khung tawhin EFC tana goal khung tam ber a ni mek.

Electric Veng an khel ṭha, Chhinga Veng lakah inkhel an thunun hret. Amaherawhchu tawnhriat nei ṭha Lalrammawia'n minute 42-naah yellow card vawi hnihna a hmu a, player 10-a khel Electric Vengin goal nei tawh mah se Chhinga Veng beiseina a nun thar phah.

Chhinga Vengin ball an chang tam chho a, goal chance erawh insiam an harsat. Minute 74-naah goal an sual chhuak a, Lalsawmzela corner pet chu MC Malsawmzuala'n a tauh goal. Siaha tlangval hi tun season-a goal 12 a khungna chiah a ni a, top scorer turin a dinhmun a ṭha ta hle.

Chhinga Vengin an tamna hmang ṭangkai lehzual turin an player pawimawh Ouattara Sie leh KC Larchhuakmawia te an chhawr thei lo. Midfielder ṭha KC-a hi first leg-a inhliam a ni a, Ivorian forward Ouattara Sie erawh sawi lawk loa haw a nih avangin team boruak thlengin a tihchhhiat phah.

Chhingcows vanduaina hi Electric Veng tan vanneihna a ni thung a, MPL danah second leg zawha an inhnehtawk a nih chuan penalty shootout pet nghal tur a ni. Extra time khelh ngai tawh lo hi Electric Veng tan chanchin ṭha a ni tel bawk.

Semifinal khelh hmain team pahnihin penalty an zir lawk thu an sawi ve ve a, amaherawhchu an zir laiin semifinal boruak rit tak telh theih a nih loh avangin inelna tak tak a dang. Electric Veng tana pettu Jacob Lalrawngbawla, Ramhlunchhunga, Lalnunmawia leh  Lalengmawia ten an khung vek. Chhinga Veng tana pettu MC Malsawmzuala, Lalsawmzela leh Lalmawizuala ten pet goal mah se vawi hnihnaa inlan F. Zosangliana'n pet chu EFC keeper Lalmuansanga'n a dansak.

Sanga hote tan Lalmalsawma pen chhuakin chakna goal khung theihna a nei a, amaherawhchu Dharminder Guru-a'n a dan sak. Chhingcows tan Ṭhasiama'n khung zuiin sudden death an thleng. EFC tan Rorelliana'n a khung a, keeper Muansanga'n Electric Veng hlimna siamsakin Silvana R. Lalruatkima goal khung tur a dansak a, BVT tlangval hi man of the match-a thlan a ni.

RG Stadium-a awm Electric Veng mipui ṭhahnem tak lawm avangin khelmualah an tlan lut a, TV lama entute lawmna a nep chuang lo. Tunah chuan season hmaa an beisei ngam loh MPL nomawi an ban phakah a awm tih a chiang tawh a, Inrinni zan MPL final en turin RG Stadium an pan ang.