Panganaah Roma an tla

Thawhṭanni zan Serie A inkhelah AS Roma chuan khualmualah 1-0 in Udinese an hneh lo a, goal awmchhun hi Jurgen Ekkelenkamp-a khung a ni.

Roma-in anmahni hnaih bertu Juventus result hre lawk chungin Bluenergy Stadium an leng lut a, minute 49-naah Ekkelenkamp-a freekick pet chu Roma forward Donyell Malen-an a dang pial a, Roma keeper Mile Svilar tan dan ngaihna a awm lo.

Aston Villa aṭanga an hawh Malen hian chance nei chhunzawm mah se goal a khung thei lo a, Bryan Cristante-a goal khung chu offside vangin pawm a ni lo a, Gianluca Mancini-a'n chance nei bawk mahse an vanneih zan a ni lo a, goal an khung thei lo. Udinese keeper Maduka Okoye a che ṭha ve bawk.

Gian Piero Gasperini hote hi an chak loh avangin table-ah panganaah an tla a, anmahni lehpeltu Juventus chu point hnihin an phak ta lo. Roma tan Paulo Dybala a la inkhel thei lo a, Argentine forward hi a khup hliam avangin a chawl a, Thawhlehnia Cagliari an mikhual hunah pawh a la inlan theih hmel loh.