Lookman-a'n Atletico a zawm

Atletico Madrid chuan Atalanta aṭangin Nigerian forward Ademola Lookman an la lut a, Atletico hian Lookman lak nan hian pound maktaduai 30.3 an thehchhuak a, June 2030 thleng khel turin contract an ziahpui. Lookman hi England-a piang zingah chuan Premier League, Bundesliga, Serie A leh La Liga-a khel thei awmchhun a ni dawn.

Kum 28 mi Lookman hian Charlton Athletic-ah a career ṭanin 2015 khan Everton a zawm a, 2019-ah Rb Leipzig zawmin, Bundesliga lamah a insawn leh a, loan-a Fulham leh Leicester tan a khelh hnuah 2022 khan Atalanta a zawm. Italian club tan kum ruk a khelh chhungin goal 55 a khungsak hman.

Lookman hi England tan youth level-ah inlan mah se 2022 khan Nigeria tana khelh a thlang zawk. 2024 khan African Footballer of the Year-ah thlan a lo ni tawh a, hemi kum vek hian Ballon d'Or shortlist-ah African player awmchhun a lo ni tawh bawk. Nikum UEFA Europa League final-ah season tluana hneh loh nei loa kal Bayer Leverkusen chu a hattrick hmanga hnehin a champion pui tawh bawk.

Atletico Madrid hi La Liga table-ah point 45 hmuin pathumnaah an awm mek a, hmahruaitu Barcelona chu point 10 in an phak lo. UCL League stage khelh zawh takah pawh a sang pariat zingah tel pha loin 14-naah an awm a, an result chhe hran lo mah se beisei an phak lo. Diego Simeone hote hi an thlen chin aṭangin hma sawn an tum a, anmahni pui turin Lookman hi an la lut ta a ni.