Edwards-a'n Wolves chakpui zo lo

NBA regular season khelh mekah nimin zing khan Memphis Grizzlies chuan Minnesota Timberwolves 137-128 in an hneh a, Wolves tan Anthony Edwards leh a ṭhiante khel ṭha viau mah se a team a chakpui zo lo.

FedExForum, Memphis-a inkhelah Grizzlies tan Jaren Jackson Jr. a langsar a, American forward hian point 30 score-in rebound vawi ruk a la bawk. Jackson Jr bakah Ty Jerome (19) leh Jaylen Wells (18) ten Grizzlies chak nan an thawhhlawk hle.

Wolves tan an thiampuipa Anthony Edwards-a'n point 39 a score a, Jaden McDaniels (29), Donte DiVincenzo (21) leh Julius Randle (19) ten thlawp ṭha viau mah se an vanneih ṭum a ni lo a, Wolves chak nan a tawk lo.

Grizzlies hi Western Conference table-ah 11-naah an awm a, playoff khelh ngei tumin kawng an zawh mek. Wolves an hneh ṭum hian Grizzlies player Ja Morant a la inkhel thei lo a, Morant hian January tawp lam khan practice-naah a kiu vei lam a tina a, February thla laihawlah a inkhelh leh theih a beiseiawm.