Atletico ngamtu Bayern MUNICH

Spanish club Atletico Madrid chuan Champions League-ah an tlawm hmel hmasa ber an hmu ve ta - Thawhlehni zan khan Bayern Munich khelmualah German champion hi 1-0 in an ngam lo. Allianz Arena-a inkhela goal awmchhun hi Robert Lewandowski-a'n minute 28-naa freekick aṭanga a khung a ni a, Atletico keeper ṭha Jan Oblak-a'n tih theih a nei lo.

Polish striker Lewandowski-a'n a goal khung hi a kawr hmaa ball dah leh a kutzungpui fawp chungin a lawm a, a nupui rai mek tan a goal khung ropui chu a hlan. Poland international chuan, "Ka nupui rai thu hi khawvel hmaah puan ka duh a, ka goal khung kha ka nupui leh a pum chhunga awm mek naute tan ka hlan a ni. Ka tan chuan zanin kha inkhel danglam bik a ni a, goal danglam tak a ni bawk. Ka hlim em em a ni," a ti.

Carlo Ancelotti naute hian hnehna chang mah se Thawhlehni zan inkhel hian an dinhmun a sawi danglam phak lo. Atletico leh Bayern hian last 16 an lut sa tawh a, tlawm zawkah ṭang mah se Diego Simeone-a naute hian hmahruaitu nichungin last 16 an lut ta tho a ni.