Chelsea chak zanah Ajax an vanduai

Everton laka an mualpho hnuah Chelsea-in team ṭha an la ni reng tih an pholang a, chak an mamawhna inkhelah Lille chu 2-1 a hnehin Champions League round of 16 an lut. 

Chelsea tan hian Tammy Abraham leh Cesar Azpilicueta te chuan goal khat ve ve an khung a, minute 78-naah Lille tan Loic Remy chuan goal rawn khung ve mah se Blues a chhaih buai pha tawh lo. Abraham hian minute 19-na lekah tun season-a a goal 13-na a rawn khung a, Willian-a siamsak ball hi back heel hmangin mawi zetin a khung - minute 35-naah Azpilicueta chuan Emerson corner aṭanga ball kal chu a khung ve leh bawk. 

Chelsea-in result lawmawm an hlawh chhuak a, manager Frank Lampard chuan Blues tan chanchin lawmawm a sawi ve zui. Lampard chuan, "Nipui lai khan kan goal khungtu leh siamtu Eden Hazard kan chan a, a hmun ruak luah tur hi kan la zawn leh a ngai dawn a ni," a ti a, transfer hremna hlih a nih tak avangin January-ah an bazar ngei tur thu a sawi. 

Group H inkhel dangah nizan inkhelh hma zawnga hmahruaitu Ajax chu Valencia lakah 1-0 in an tlawm a, an tla! Dutch team tan last 16 lut turin draw result hlawh chhuah a tawk a, mahse minute 24-naa Rodrigo goal khung chu chhanglet thei loin an tla. Valencia defender Gabriel chu hun pek belhah hnawhchhuah a ni a, mahse season hmasa semifinalist Ajax tan a tam zawk an nih chhawrna turin hun a tam tawk tawh lo.