Europa League Zaninah United dinhmun a chiang dawn

Europe-a club inelna sang ber dawttu Europa League-ah Manchester United an inlan dawn a, Jose Mourinho naute hian group stage-a an match hnuhnung ber khel turin zanin dar 11:30 hian Zorya Luhansk an lenchilh dawn.

Premier League club tan last 32 lut turin Zorya khelmualah point khat hlawh chhuah a tawk a, hnehna an chang zo lo a nih pawhin inkhel lehlama Feyenoord leh Fenerbahce result-a zirin an dinhmun hi danglam leh thei tur a ni.

United dinhmun

Manchester United hian Group A-ah pahnihna dinhmun an luah mek a, vawi nga inkhel an hmachhawn tawhah point kua an nei. An chung chiaha awm Fenerbahce chuan point 10 an hmu mek a, United vanneihna chu an hnuai chiaha point sarih nena awm Feyenoord leh Fenerbahce inhmachhawn tur hi a ni.

United hian hnehna chang zo lo pawh ni se inkhel leh-lamah Feyenoord an tlawm chuan last 16 an la lut thei dawn tho a, Dutch club hian hnehna an chang a, United-in Zorya an draw bawk chuan Fenerbahce nen club pathum hian point 10 ṭheuh an hmu dawn tihna a ni. United-in Feyenoord leh Fenerbahce laka head-to-head record an neih ṭhat ve ve avangin last 32 an lut tho ang.

Talbuai United

Jose Mourinho-a nauten Pre-mier League-a an match hnu-hnung berah Everton an inhnehtawkpui a, Premier League ṭan a nih hnuah an season hman chhiat ber United-in an hmang mek. Portuguese manager lu hai belhchhahtu tur chu Pathianni zana Tottenham Hotspur an hmachhawn lehnghal a ngai tur hi a ni.

United hian an hma lawka Premier League match pawimawh an khelh dawn avangin player an siksawi nual a rinawm. Nimin khan Zorya hmachhawn tura squad zinchhuak puan a ni a, Everton hmachhawn lo zingah Wayne Rooney leh Eric Bailly chu hruai tel a ni. Chris Smalling leh Luke Shaw chu zin zingah hliam vangin an la tel lo.

Mourinho-a'n Michael Carr-ick, Matteo Darmian, Antonio Valencia, Memphis Depay leh Morgan Schneiderlin-te in lama chawlh hahdamtir a thlang zawk bawk.

Tunge lut tawh?

Europa League-a inlan club zingah Ajax, Roma, Schalke, Shakhtar Donetsk, Sparta Prague, Zenit St. Petersburg, Anderlecht, APOEL, Athletic, Genk, Krasnodar, Olympiakos leh Saint-Etienne te chu last 32 lut chiang tawh an ni. Premier League club Southampton chuan zanin dar 1:35 hian Hapoel Beer-Sheva an mikhual ve dawn bawk a, hnehna an chang emaw goal chhuah loa an khingpui hi an inhnehtawkpui a nih loh chuan last 32 an lut lo ang.

United player zin chhuak

De Gea, Romero, Johnstone; Fosu-Mensah, Jones, Bailly, Rojo, Blind, Young; Fellaini, Herrera, Pogba, Lingard, Mata, Mkhitaryan; Martial, Rashford, Rooney, Ibrahimovic.