Chapecoense LaMia airline hotupa man a ni

Bolivia rama thuneitute chuan Brazilian club Chapecoense chuanna thlawhtheihna neitu Lamia Airlines general director Gustavo Vargas Gamboa chu thlawhna chetsual chhan an chhui zelnaah an man.

Vargas hi Bolivian air force hnuaia thawk ṭhin niin kum 2001-2007 inkarah khan an ram president hrang hrangte hrawnin pilot hna a chelh a, tuna Bolivia president Evo Morales thlawhtheihna pawh hi a lo khalhsak tawh ṭhin.

Hetihlai hian Lamia Airlines thlawh chhuahna Viru Viru air-port a air traffic controller Celia Castedo chu Bolivia aṭangin Brazil lamah a tlanchhe mek a, Bolivian official hian Brazil sorkar hnenah venhimna pe turin a ngen. Chapecoense team chuanna Avro RJ85 aircraft chetsual chhan kha a tui a zawh vang niin an sawi a, a chetsual chhan chhui zelnaah pilot Miguel Quiroga chuan electric chian loh thu leh a tui lama buaina a awm thu a sawina tape chu hmuhchhuah a ni.

Castedo chanchin

Brazil sorkar hnena venhimna dil mek, Bolivian official Celia Castedo chuan thlawhtheihna a thlawh chhuah hma khan pilot Quiroga hnenah a tui a neih tlem thu a hrilh ngei niin a sawi a, mah se pilot hian Medellin thlenna khawp neia a inngaih avangin a thusawi hi a ngai pawimawh duh lo niin a sawi.

Celia Castedo hian Brazil sor--kar hnenah venhimna dil mah se Brazil-a thuneitute chuan Castedo dilna tihlawhtling tur chuan kum khat tal ngaihtuah a ṭul tur thu an sawi a, Bolivia minister Carlos Romero chuan Brazil chu Castedo dilna chu tihhlawhtlinsak lo turin a lo ngen ve mek bawk.

Bolivia minister Carlo chuan, "Celia-i pawi khawih hi a lian tham em em a, ṭhenawm rama venhimna a dil hi thudik hailan tumna lama zalen a tum vang a ni," tiin a sawi a, Celia-i hian an ramah vauna nasa tak a dawn vanga Brazil hnena venhimna dil a nih thu a sawi thung.

Warning tel lo?

Thlawhtheihna chesualah khan mi 77 chuangin an zinga mi paruk an dam chhuak a, mi 71-in nunna an chan. Chapecoense player pathum chu dam chhuak zinga mi an ni a, thlawhtheihnaa hnathawk dam chhuak Erwin Tumuri chuan thlawhnain buaina a tawh chungchangah hian an mi phurhte chu warning pek an nih miah loh thu a sawi.

Tumuri chuan Brazil-a tele-vision channel lar tak Globo TV hnenah he thu hi sawiin, "Thlawhtheihna a buai khan passenger te hnenah engmah hrilh a ni lo a, Medellin pana kan thlawh chhuah leh hma khan Bolivia khawpui pakhat Cobija-a a tui thun khahna hun remchang nei bawk mah ila pilot chuan a tui thun loa thlawh zel kha a thlang zawk a ni," a ti.

Thlawhna chetsual vanga player 19 zet chantu Chape-coense chu an chetsual vangin Sudamericana Cup final-ah Atletico Nacional hmachhawn thei ta lo mah se an khingpui tur Colombian club hian champion tir zawk tura South American Football Confederation hnenah ngenna an thehluh angin Europa League tlukpui inelnaah hian champion-ah puan an lo ni tawh.