Player 12-na mipui pawimawh zan Chanmari West Vs Bethlehem Vengthlang

Mizoram Premier League final khel thei hi club pathum chiah an la awm a, chung club zinga tel tur chuan Chanmari West leh Bethlehem Vengthlang tan hmunruak pakhat a awm - zaninah a chiang dawn.

December 1 khan semifinal first leg chu khelh a ni a, West Warrior leh BVT te 1-1 in an in-hnehtawk. Zanin dar 7:00 hian Lam-mualah second leg khelh a ni dawn a, inkhel en man hi Rs 50 a ni.

Semifinal!

MPL semifinal hi double leg-a khelh a ni nachungin first leg-ah chak zawk an awm loh avang leh away goal rule a awm loh bawk avangin final lut turin second leg-a chak a tawk. Minute 90 chhunga chak zawk an awm lo a nih chuan penalty shootout hmang-in chak zawk zawn a ni ang.

BVT-in league round aṭangin point 27 an hmu a, semifinal lut tur zawnnaah pakhatna an ni. Kumin I Day Football-a group stage patlang zo lo club tan chuan an thlen chin ringawt pawh hi hlawhtlinnaah a chhal theih. Chutihrualin MPL bik thlir chuan final an thleng lo a nih chuan an ui kumkhua tawh ang.

West Warrior-in MPL2 aṭangin Mizoram football league sang ber an khel ṭan a, kumin hi an squad neih ṭhat ber ṭum a ni. Tun sea-son hi an tan nomawi chawi theih-na hun ṭha a ni a, season thar thlir loin tun hunah hian an theih-na zawng zawng an sen a ṭul a ni.

Player 12-na mipui

MPL semifinal boruak a dang - BVT-in ngaiah an la nei thei lo a, Chanmari West mipuiin an la hrethiam lo bawk.

Club pahnih supporter hi first leg-ah an club ṭawiawm turin Lammualah pungkhawm ṭha mah se an tihtur tak an ti lo - an team an au phur zo lo.

Player ang thoin mipui chung-ah pressure a tam a, ṭum danga an zai rual ṭhup ṭhup angin an zai thei lo a, Lammual boruak a nung tawk lo.

Zaninah erawh first leg boruak tem tawh an pungkhawm dawn a, awmze neiin an zai rual leh thei tawh ang. BVT mipuiin an hla pui bakah 'Company sum tual, a zim laiah Chanmari West kan nek sawr pawr e' tih sak inring chungin Lammual an pan dawn a, Chanmari West mipui lamin BVT mipui sak lar sa hla hmanga au el lêt an hreh dawn lo.

Khelmual chhunga inbeihna a pawimawh dawn tih a chiang a, amaherawhchu player 12-na mipui hian khelmual chhunga inbeihnaah danglamna an thlen theih tih hi football khawvelah chuan nemngheh a ni tawh. Mipui tam dan leh an thawm aṭangin Chanmari West leh Bethlehem Vengthlang te pahniha chak duh zawk a hriat ang.

Danmawia tel loin?

First leg-ah R. Laldanmawia chu inhliam vangin Chanmari West coach HC Zarzoliana'n loh theh loin a la chhuak a, second leg khel turin a dinhmun a la chiang lo. Sialhawk tlangval thlak thei tur chu Lalmuanzuala a ni ang a, Lengpui tlangval hian tun season-ah minute 836 inlan tawhin goal hnih a khung tawh.

West Warrior tana thu lawm-awm chu hrem vanga semifinal khel thei lo Ramengmawia a rawn kir dawn a, coach Zara'n tlar hmaah H. Lallianzama leh Ramenga inkara induhthlan tur a nei tihna a ni.

MPL1 Dinthar champion puitu coach Zara chuan, "First leg-ah inchhuang thei kan awm lo ve ve a, second leg hi kan din-hmun hriltu tur chu a ni. Kan theihna anga kan khel chhuak thei a nih chuan dinhmun
ṭha zawkah kan inngai a, final thlen tumin first leg ai khan kan thawhrim erawh a ṭul ang," tiin Vanglaini palai a hrilh a, mipui ṭawiawmna a ngen tel bawk.

Dingngheta a dam

BVT-in inhliam vangin har-satna an nei lo a, captain Lal-ding-ngheta khelh leh khelh loh pawh coach Lalbiaksanga Colney duhthlannaah a innghat tawh.

BVT boss BS-a Colney chuan, "Tun season-ah vawi hnih hneh tawh mah ila kan intluk tawk tih chu first leg-ah a chiang. A vannei zawk an chak ang. Player ang thoin fan an pawimawh dawn a, BVT mipui a tam thei ang berin min rawn ṭawiawm turin ka ngen," tiin inchhuang thei an nih loh thu a sawi.

Engtin zel?

Bethlehem Vengthlang FC-in semifinal-ah fimkhur vangin 4-5-1 formation an hmang a, an hmang chhunzawm ang em, tih hi zawhna awm chu a ni. BS-a hnuaiah BVT-in 4-4-1-1 formation an hmang tam a, an hman thiam saa an let a nih ngat chuan an goal bawh a na sawt ang.

BVT hian mimal chawi-mawina dawng thei tur pla-yer pali an kawl a; keeper Mal-sawm-dawngzela, defender H. Lalhlimpuia, midfielder Zo-sangkima leh forward Lalram-muanpuia ten an theihna an pho chhuak a nih chuan West Warrior tan an hnawksak tham ang.

Chanmari West tan cap-tain Laldampuia'n match thum a zawningoal a thun tawh a; Kawrtethawveng tlangval bakah hian keeper Lalruatpuia, defender Vanlalzuia Hnamte, midfielder K. Lalnunzama leh forward R. Laldanmawia te mimal chawimawina dawng thei tur khawpin an khel ṭha bawk.

West Warrior coach Zara'n first leg-ah defensive midfield pahnih a chhawr a, coach tawn-hriat nei ṭha hian a ṭul a nih chuan formation thlak a hreh lo ang. Goal an mamawh avangin defenisive midfield pakhat a hmang a nih pawhin a mak lo ang.

Semifinal Leg 1 Thlirletna

Bethlehem VT 1 - 1 Chanmari West

BVT : Lalrammuanpuia 5'

CWFC : Laldampuia 8'

MoM : Vanlalzuia Hnamte, CWFC