Vawiin aṭangin MPL Qualifier Mizoram Police vs Venghlui

8th December, 2016

Mizoram Premier League Season 6 khel tur zawnna MPL Qualifier chu vawiin aṭangin Lammualah khelh ṭan a ni dawn.

Chhun dar 1:00 hian Aizawl DFA champion Mizoram Police leh Venghlui FC ten match hmasa ber an khel ang.

MPL Qualifier-ah hian District FA pariatten team hnih ṭheuh an thawh thei a, Aizawl DFA aiawhin Mizoram Police leh Venghlui te telin Serchhip DFA aiawhin New Serchhip FC an tel a, District FA dangten team an thawh lo.

Club pathum hi vawi khat ṭheuh an inkhel kual ang a, heta point hmu sang ber hian MPL6 an khel ang. Pahnihnain MPL Playoff an khel chhunzawm ang a, MPL5-a pasarihna Ram-hlun North FC nen double legged playoff an khel ang.

Mizoram Police hi MPL ṭantirh khan hriat-thiam an ni a, club dangte angin Firms and Society hnuaiah an inziak lut lo. An relegate hnuah erawh Police chungah dan lekkawh a ni a, MPL Qua-lifier khel turin Firms and Society hnuaiah an in register thlap tawh. Venghlui FC hi First Divi-sion-ah pathumna ni mah se pahnihna Aizawl FC Academy-in MPL an khelh theih loh avangin qualifier an khelh theih phah thung.

Police hian Venghlui hi first division-a an intawn hmasak zawkah 5-1 in an sawp a, an vawi hnih intawnnaah erawh 1-1 in an inhnehtawk. Venghlui tana match hniha goal khung ve ve tu Lalremruata'n MPL club Ramhlun North a zawm tawh avangin an chhawr thei dawn lo a, player ṭhahnem tak an lakluh tho avangin buaina tur a awm lo.

Venghlui hian MPL5-a inlan hman, October transfer huna hmun danga chhuak ta an nei nual. Chhinga Veng player hlui Vannunmawia, Van-lalhriata leh Lal-sawm-^-zela te an lakluh bakah Dinthar aṭangin Lallawmkima (Tea) leh Ramhlun North aṭangin PC Lianhmingthanga an la lut bawk. MPL-a tawnhriat nei tawh Robert Lalhruai-tluanga leh James Lalhming-sanga te an neih bakah an player ṭhenkhat hi MPL qualifier-a tawnhriat neite an ni.

Mizoram Police ṭhat zia erawh sawi nawn a ngai tawh lo a, tlang tura rin-kai an ni. Police hi ADFA champion an ni a, amaherawhchu an nomawi vang hian Mizoram football league sang ber an khel dawn tihna erawh a ni lo.