Novak Djokovic leh a coach inthen

Grand Slam vawi 12 cham-pion tawh Novak Djokovic leh a coach Boris Becker te chu kum thum chhung zet an inkawp hnuah an thawh dunna an ti tawp.

Wimbledon, US leh Austra-lian Open champion lo ni tawh Becker kaihhruaina hnuaiah Djokovic hian kum thum chhung-in Grand Slam nomawi paruk ngawt a chawi a, hemi hun chhung hian major tounrmanet-ah a champion kim vek.

Serbian tlangval Djokovic hian kuminah a vawi khat nan French Open nomawi chawi mah se tournament dangah beisei a phak hleithei lo a, season tawp lamah phei chuan Andy Murray lakah chawlh kar 122 chhung zet a lo awm tawhna world number 1 nihna a hloh hial.

World number 2 Djokovic chuan, "Kan thawhdun ṭan tirh dawna kan duhthusam leh ruahman lawk ang zawng zawng kha chu kan tawng kim vek tawh. Min thawhpuina, a inpekna leh ruahmanna ṭha takte avang khan a chungah lawmthu ka sawi," tiin a sawi.

Kum 29-a upa Djokovic chuan sawi chhunzawmin, "Tunah chuan thil tum dang ka neih a hun leh tawh a, a ṭha thei ang bera hun rei tak ka khelh chhunzawm theihna tur ruahmanna ka neih a ṭul. Duhthusama ṭhain season khar lo mah ila kum tharah chuan ka khelh ṭhat leh theih tawh ka beisei," a ti.

January thla hian Grand Slam hmasa ber atan Australian Open an khel leh dawn a, champion lai chu Djokovic niin final-ah Murray a hneh - season tharah chuan anni pahnih bawk hi inel leh tura ngaih anni ang.