National Sub Junior champion Jeho

8th December, 2016

Table Tennis Federation of India (TTFI) hnuaia inelna lian 11Even Sports 78th Cadet and Sub-Junior National Table Tennis Championship-ah Jeho Himnakulhpuingheta a champion.

Sub Junior final hi Thawh-lehni khan SMC Stadium, Sili-guri-ah khelh a ni a, Lunglei Salem Veng naupang Jeho-a hian Petroleum Sports Promotion Board (PSPB) lama a zir pui Chinmaya Somaiya chu 11-8, 11-7, 11-7, 11-13, 11-9 (4-1) a hneh-in a vawi khat nan National Sub Junior champion a ni.

November thla Aizawla neih zawh tak TTFI National Ranking Table Tennis Championship-a silver medal la tawhtu Jeho-a hian final-ah inkhel a thunun hneh hle a, game hmasa pathum lain harsatna nei loin hnehna a chang. Jeho hian semifinal-ah Delhi naupang Payas Jain chu 10-12, 12-10, 11-6, 11-5, 8-11, 12-10 in a lo hneh tawh bawk.

Mizo naupang dang Alberto Lalremruata pawh he inelnnah hian a inlan a, singles-ah a vanduai thung. Mission Veng naupang Alberto leh Jeho-a hi doubles-ah ṭang dunin final-ah West Bengal duo Tamal Ballav leh Abir Roy te chu 4-1 a hnehin champion nomawi an chawi bawk.

India president Pranab Mu-kher-jee hnen aṭanga National Child Award for exceptional Achievement 2015 dawngtu Jeho-a chuan, "National Championship-ah bik chuan tun ṭum hi sub junior-a ka champion vawi khatna a ni a, ka lawm tak zet. Pathian hnehna min ṭawngṭai puitute vanga hetiang dinhmun thleng thei hi ka ni," tiin Vanglaini palai a hrilh.

Jeho-a hian training-na lama a hneh hleih theih loh Somaiya chu inelna tak takah a hneh tak avangin beiseina a neih san thu a sawi tel bawk. Alberto pawhin singles-ah beisei phak lo mah se doubles-a an champion chu lawmawm a tih thu a sawi ve bawk a ni.

Table Tennis-ah chuan India hi zone panga - East Zone, North Zone, Central Zone, Indore Zone leh South Zone-ah te ṭhen hran a ni a, Mizoram Table Tennis Assocition chuan November thla khan East Zone hi a lo thleng tawh. Tun ṭuma National Table Tennis Championship hi chu zone hrang hrang aia lian a nih avangin ranking point leh lawmman pawh zone lama an dawn let zel an dawng.