BVT-in final an thleng ta

Bethlehem Vengthlang FC-in an club history-a vawi khat nan Mizoram Premier League final an lut. Lalbiaksanga Colney hote hian MPL5 semifinal first leg-ah Chanmari West nen 1-1 a an inhnehtawk hnuin nizan khan Lalrammuanpuia (Apuia) goal hmangin 1-0 in an hneh.

Armed Veng South tlangval Apuia hi man of the match atan thlan a ni a, semifinal hmasa zawkah a club hlui West Warrior lamah goal a khung tawh a, MPL5-ah goal ruk khung tawhin BVT tana goal khung hnem ber a ni bawk. BVT hian December 16, Zirtawpni zanah Aizawl FC leh Chanmari FC inkhela a chak zawk nen final an khel ang.

Kumin hi BVT tan kum ṭha a ni a, veng inelna lian NECS Cup-ah an champion hnuin MPL Under 18-ah nomawi an chawi leh tawh. Tuna an hmabak chu Mizoram chhunga football inelna sang ber Mizoram Premier League-a champion a ni.

Danmawia leh Reuben

Chanmari West player-ah MPL-a tawn-hriat nei ṭha pahnih thlanchhuah tur ni se R. Laldanmawia leh Reuben Zosangpuia aia thlan awm an awm lo. Amaherawhchu MPL1-a Dinthar champion puitu player pahnih hi inhliam vangin bench aṭangin bul an ṭan a, tlarhmaah H. Lallianzama aiah hrem vanga first leg khel thei lo Ramengmawia luhtir a ni bawk.

West Warrior coach HC Zarzoliana'n an khelh dan 4-2-3-1 formation chu 4-1-4-1 ah an thlak a, penalty shootout pumpelh a tum tih a hriat theih.

Sangkima In

MPL5 best midfielder nominee Zosangkima chu Kolasib tlangval Lalrintluanga aiah inkhel bul ṭantir a ni a, BVT coach BS-a'n player pakhar chiah tidanglam mah se an khelh dan erawh a dang hlak.

BVT hian first leg-ah 4-5-1 formation an hmang a, second leg-ah erawh defence pa-hnih hmaa ding Laldinpuia chu goal khung turin tlar hmasa berah dahin 4-4-1-1 formation an hmang. Samthang tlangval Dinpuia hnungah hian best forward nominee a tel pha Apuia dah a ni bawk. Captain Laldingngheta chu inkhel bul ṭantu zingah telh a ni lo.

Goal mawi bik

Inkhel hmuhnawm tak nichung siin goal hlauhawm hmuh tur a awm mai lo. Minute 21-naah West Warrior winger Lalbiakhlua cross chu Ramenga'n BVT keeper Malsawmdawngzela tana harsa tur khawpin a tauh na lo.

BVT hun a thleng a, winger Laldinliana Varte chu penalty area-ah West Warrior midfielder Lalmuanzuala'n titlu mah se penalty pek a ni lo. BVT-in an nawr zel a, minute 44-naah goal an sual chhuak.

West Warrior defender ball clear chu BVT defender H. Lalhlimpuia'n cool takin keeper Mala a pe a, Khawzawl tlangval hian Zothanpuia pe lehin Bethlehem tlangval ball vawrh luh chu Lalnunmawia'n tauh pialin Armed Veng South tlangval Apuia'n vawi khat khawihnaah amah vengtute tlan pelin, a vawi hnih khawihnaah BVT forward hian kawh zetin a pet goal.

An ṭang tluan

Chanmari West-in an siphurh sut tumin Danmawia leh Lianzama te an luhtir a, an goal nawr a na sawt bawk. Sialhawk tlangval Danmawia awm hnuah captain Dampuia a inlar ṭan a, West Warrior-in an zia tak tak an pholang.

Amaherawhchu BVT-in tlarhnungah MPL best defender vawi hnih ni tawh Thangpuia leh MPL5 best defender nominee Lalhlimpuia te an kawl a, an hmaah tawnhriat nei ṭha midfielder Zosangkima leh Samson Ramengmawia te an awm bawk avangin pressure sangah an buai lo.

Second half-ah goal a lut lo a, hun tawp dawn hnaiah substitute R. Lalremruata khawih per chu Dampuia'n a khawih fuh hman lo chiah chiah a, goal sirah kalin BVT an him hram. BVT lam pawhin goal chance an nei tho a, Apuia'n goal khat bak a pai lo a, Dinpuia'n goal a keng tel lo mah se final thleng turin first half-a an goal khung a tawk.

BVT an lawm

Hun tawp hamrik a ri a, BVT mipuiin 'kan lawm e, kan lawm e' tiin an au rual dual dual a, an lawm tih phat rual a ni lo. Armed Veng pachal BS-a Colney-in MPL club a vawi khat enkawlnaah final a thlen pui nghal a, MPL league round-a hmahruaitu an champion zui ziah bawk avangin nomawi chawi turin beisei an nei sang khawp ang.

ZoFooty Statistics

Chanmari West 0 - 1 Bethlehem VT

BVT : Lalrammuanpuia 44'

MoM : Lalrammuanpuia, BVT

Agg-ah BVT 2-1 in a chak

52% Ball Possession 48%

15 Shots 18

5 On Target 7

0 Yellow Cards 1

0 Red Cards 0

Powered By Rainbow Multibrand

Mobile Showroom

Tute nge inlan?

Chanmari West (4-1-4-1) : Lalruatpuia; Racy K Lalremmawia, Toky Zomuanpuia, R. Lalawmpuia (R. Laldanmawia 51'), Vanlalzuia Hnamte; K. Lalnunzama; Lalmuanzuala, Lalmuansanga, Lalbiakhlua (H. Lallianzama 63'), Laldampuia; Ramengmawia (R. Lalremruata 79').

Bethlehem VT (4-4-1-1) : Malsawmdawngzela; K. Lalmalsawma, H. Lalhlimpuia, Zothanpuia, Hmingthanmawia; Laldinliana Varte (Laldingngheta 83'), Zosangkima, Samson Ramengmawia, Lalnunmawia; Lalrammuanpuia; PC Laldinpuia.