Inlehthalna ropui a thleng dawn em? Aizawl FC Vs Chanmari FC
Zanin dar 7:00 hian Mizoram Premier League champion lai Aizawl FC leh Chanmari FC ten semifinal second leg an khel dawn. Khelmual chhungah Chanmari 4-1 in chak mah se field pawn boruak a san tel avangin Lammual pan a manhla ang.
Khelmual pawn
Aizawl FC coach K. Malsawm-kima'n first leg zawhah, "Chanmari ang player hi chu MFA Super Cup leh I Day Football champion pui theih tur an ni," tiin chak lo mah se coach Lalsangzuala Hmar tana hriat nuam lo turin a ṭawng zeuh.
MPL2 champion Chanmari manager Mawitea chuan, "Round tawp bera AFC kan hneh lohin chhuanlam kan siam lo a, semifinal-ah khan captain Rohminga a rawn kir a, an ṭha tawh zawk. An chak lo tih pawm mai rawh se," tiin an coach Sanga a chhan.
I League club hian first leg-ah Chanmari FC 1-4 in an hneh lo a, zaninah goal thum tal an khung lo a nih chuan club neitu Robert Romawia Royte duhthusam a thamral ang. Aizawl FC-in kum zawnin MPL nomawi an chawi tawh a, club neitu Robert hian season ṭan hmain 'a lungthu kim nan' MPL5 an champion ngei theih nan technical team chu an player duh ang la turin a hrilh.
Chanmari FC coach Sanga chuan, "Aizawl FC hi I League club an ni a, an duh ang player la thei tur an ni. Keini chuan AFC aṭangin an chhawr duh loh ṭhiau MS-a, Thomas leh Muanzova te kan lalut. Tuna kan player-te hi season ṭan hma khan min chuh se chuan kan chang lo zawk ang," tiin AFC chu duh thlang thei club an nih thu a sawi.
Mala thusawi chhangin Sanga chuan, "Mala hi Mizoram coach
ṭha a ni a, nomawi chawi tur ang chu a chawi vek tawh. Kei chu hman ni lawk khan Sir Thlanga hnuaiah marker leh cone remtu ka ni a, tuna kan player MS-a, Chhinga leh Rinchhana te ball pet chhartu ka ni. Mala chu khitah a awm a, kei chu khu tah ka awm a, Mala nena khaikhin tur ka ni lo. Chutihrualin I Day Football leh MFA Super Cup hi chu ka la champion khawp ang," tiin a sawi.
Chanmari coach Sanga hian Bethlehem Vengthlang a enkawl laiin I league khel tura player ṭha awm khawmna Spanish manager Manuel Retamero-a enkawl Aizawl FC hnehin MFA Super Cup a champion tawh.
Comeback Ropui?
Aizawl FC-in inhliam vangin defender pawimawh Lalramchullova leh Lalrinzuala Khiangte bakah rawlthar defender Hmingthanmawia te an chhawr theih hmel loh a, hrem vangin Ricky Lallawmawma a inlan dawn lo bawk. Amaherawhchu I League club hian Chanmari right back rinrawl ni ṭhin Lalhriatrenga (Achia), Shillong Lajong defender hlui Lallawmzuala, India junior team tana khel tawh Lalṭhakima, Chanmari an hneh hnuhnun ber ṭuma man of the match-a thlan Jonathan Lalhriatkima leh an academy chhuak Lalramhmunmawia te an awm avangin zuam theih an ni lo.
Midfielder Lalbiakthanga leh winger Albert Zohmingmawia ten training an zawm leh tawh bawk avangin Chanmari defender ten nuam sa takin hun an an hmang lo ang. AFC boss Mala chuan, "Minute 90 khelh tur a la awm a, kan theihtawp kan chhuah ang," tiin an la beidawn loh thu a sawi.
A la chiang lo!
Chanmari coach Sanga chuan, "Minute 90 chhunga goal li kan khung theih chuan AFC pawhin goal li an khung thei tihna a ni," tiin chak chiang saah a in dah duh lo.
Hei erawh hriat tel a ngai, Aizawl FC leh Chanmari FC hi vawi 21 an inkhel tawh. I League club hi vawi 13 an chak tawh laiin Chanmari hi vawi sarih chiah an la chak a, Sanga hote hi final thlen ringawtah an lungawi dawn lo - chak an tum dawn.
Chanmari FC defender Lalmuanawma chu inhliam vangin squad-ah dah a ni dawn lo a, Ivorian forward Leonce Dodoz erawh dam chiang lo mah se squad-ah a awm chiang. A tawi zawng chuan Chanmari FC hi inhliam vangin an buai lo.
Shabaash Chanmari
Chanmari mipuiin tun season-ah an coach Sanga an ṭawiawm ṭha tawk lo a, tun erawh an ngam loh Aizawl FC lakah 4-1 in hma a hruai pui mek. Final lut turin Chanmari hi rinkai an ni tawh a, nomawi chawi an tum a nih chuan zanin aṭangin Lammualah boruak an siam ṭan a hun tawh.
Aizawl FC erawh club huaisen an ni a, dinhmun chhe zawka ana wm hnua kumina I Day Football leh MFA Super Cup an champion thei hi thil ropui a ni. Amaherawhchu Mizo club zinga I League khel pha awm chhun AFC hian Durand Cup final an lut zo lo a, MPL semifinal-ah an tla leh a nih chuan tun season an hman danah lungawi a har ang.
SEMIFINAL LEG 1 THLIRLETNA
Chanmari FC 4 - 1 Aizawl FC
CFC : Vanlalbiaa Chhangte 3'; Lalruatfela Zote 11';
Rohmingthanga 22'(OG); Lalrinchhana 49'
AFC : Lalawmpuia Hnamte 21'
MoM : Lalrinchhana, CFC
Tute nge inlan?
Chanmari FC (4-4-2) : F. Lalmuanawma; C. Lalrosanga, Ugochukwu Godswill, Lalrinchhana Tochhawng, Thomas Lalengkima; Vanlalbiaa Chhangte, R. Malsawmtluanga, Lalrinchhana, Lalruatfela Zote (Rosangliana 90+2'); Leonce Dodoz (Lalrammawia 69'), Malsawmfela (Lalmuanzova 80').
Aizawl FC (4-3-3) : Zothanmawia; Lallawmzuala (Lalrinzuala Khiangte 27'), Jonathan Lalhriatkima, Hmingthanmawia, Ricky Lallawmawma (Red Card -78'); Lalnuntluanga (B. Zoramthara 39'), Rohmingthanga (F. Lalremsanga 72'), Lalawmpuia Hnamte; William Lalnunfela, Bright Middleton Mends, Brandon VL Remdika.