Europa League khel tur Spurs

Tottenham-in Champions League-ah beisei tur nei tawh lo mah se Europe inelna aṭanga kut ruak maia haw an duh bik lo - an mikhual CSKA Moscow chu 3-1 a sawpin group E-ah pathumna an ni a, Europa League last 32 an khel dawn.

Russian club tan Alan Dzagoev chuan goal hmahruai khung mah se Spurs-in Dele Alli leh Harry Kane hmangin an chhanglet a, CSKA keeper Igor Akinfeev chuan Spurs hnenah 'thilpek' hlanin Alli ball tauh chu an lamah a tilut bawk.

Spurs hian Champions League group stage-a pathumna dinhmun an luah avangin Europa League last 32-ah seeded an ni nghal a, nizana inkhel Manchester United leh Southampton ten last 32 lut pawh nise English club pahnih hi an hmachhawn thei lo.