Highlanders mualah Chennaiyin leng dawn

NorthEast United chuan zanin dar 7:30-ah Indian Super League match khel turin Chennaiyin FC an mikhual dawn a, team pahnih inkhel tur hian ngaihven a hlawh hle. 

Highlanders hian tun season league match-a a vawi khat nan ATK chu Inrinni zan khan Guwahati khawpuiah an ngam lo a, mahni muala tlawm nawn an duh lo ang. Chennaiyin hi Owen Coyle enkawlna hnuaia beiseina nei thar an ni a, English coach enkawlna hnuaia an match hmasa berah Mizo tlangval Isaac Vanmalsawma ngam loin Jamshedpur nen 1-1 in an inhnehtawk. 

Bolton Wanderers boss hlui Coyle hian JFC an inhnehtawkpui ṭumin referee a dem a, John Gregory bantu Chennaiyin thuneitu lamin chhuanlam dang ngaihthlak an duh lo ang. NorthEast United hian K. Lalṭhathanga, Lalrempuia Fanai leh Lalengmawia an kawl mek a, Chennaiyin-ah hian Lallianzuala Chhangte, Zohmingliana Ralte, Jerry Lalrinzuala leh Laldinliana Renthlei an awm thung. Jeje Lalpekhlua chu Chennaiyin-ah hian la awm mah se hliam vangin tun season-ah a la inlan miah lo.