Dempo-in I League an khel duh lo
Indian football a buai zual zel a, tun hmaa ngaihhlut ṭhin I League chu khelhna tlaka ngai lo club an pung zel.
India ram champion ni ngun ber Dempo SC chuan season tharah I League khelh an tum loh thu an puang. Season tharah Goan club hi Aizawl FC hmachhawn turin Mizoramah an lokal dawn lo tihna a ni.
Season hmasa 2nd Division champion hian I League khelh an tum lo tih thawm a lo ri fo tawh a, Nilaini zan khan I League-a inlan an tum loh thu hi tichiangin All India Football Federation (AIFF) general secretary Kushal Das hnenah ziakin an thehlut.
Mangṭha Dempo
Dempo chuan an lehkha thehluhah hian, "Kum 2016-17 I League-ah kan inlan thei dawn lo tih hi rilru hnual tak chungin kan hrilh duh che u a ni. May thla khan New Delhi-ah meeting neih niin AIFF chuan I League leh ISL tihdanglam in tum thu in sawi a, tun thleng hian in hmalak dan turah thutlukna chiang tak siam in la nei lo. I League khel tura sum sen hnem a ngaihziate ngaihtuahin hetiang thil buai tak kara league khelh hi kan duh lo a, Dempo Group of Companies leh club enkawltute chuan I League aṭanga inhnuhdawh mai hi kan duh ta a ni," tiin an ziak.
India ram football club hlawhtling ber pawl hian chawlh mai erawh an tum lo. Indian football-in hma a sawn theih nan theihtawp chhuah chhunzawm zel an tum thu an sawi a, football academy changtlung tak hawng tura inbuatsaih an tum.
Tel loh chhan
India rama football thuneitu sang ber AIFF-in kum 2018
aṭangin Indian Super League chu India rama league sang ber nihtir an tum a, I League club ho chu second division-ah dah khawmin League One khelhtir an tum.
AIFF ruahman dan chuan a tlem berah kum ruk tal chu League One club-te tan ISL khel turin a inpet tlin theih loh a, ISL club an relegate thei lo bawk ang.
Hun rei tak chhung Indian football-a sum lo seng tawh I League club ten he ruahmanna hi an hrethiam thei lo a, Goan club zingah Dempo hma hian Salgaocar FC leh Sporting Clube de Goa te chu I League aṭang hian an lo inhnukdawk tawh bawk.
Engtin zel?
Season hmasa I League ṭan a nih dawn khan AIFF ruahmanna hre rutu Royal Wahingdoh leh Pune FC chu I League aṭang hian an lo inhnukdawk tawh. Tun dinhmunah East Bengal, Mohun Bagan, Bengaluru FC, DSK Shivajians, Mumbai FC, Shillong Lajong leh Aizawl FC chu I League club awm mek an ni.
Salgaocar leh Sporting Goa an inhnuhdawh khan AIFF chuan I League-a hmun ruak awm chu ṭum dang ang thoin sum hmangin an lo zuar tawh a, tun dinhmunah chuan FC Bardez, Minerva Academy FC leh Chennai City FC-te chu dilna thehlut an ni. I League-ah club pasarih chiah an awm mek avangin AIFF hian club pathum hi a lalut vek a nih pawhin a mak lo ang.
ISL-a inlan tur
Indian Super League-ah club pariat an awm sa a, AIFF ruahmanna ang chuan ISL hi India-a league sang ber a nih hunah club 10 an awm ang.
AIFF chuan heng ISL team pariat bakah hian I League club aṭangin Bengaluru FC, East Bengal leh Mohun Bagan chu ISL-ah hian tel ve tir an tum. Kolkata aṭangin ATK an awm sa bawk avangin club pathum an awm a remchang dawn lo a, East Bengal leh
Mohun Bagan-a a khawi emaw zawk zawk hi ATK nen inchhun fin turin ruahmanna an siam.
Tute nge Dempo?
Mizo tlangval Jerry Zir-sanga leh Jeje Lalpekhlua ten Dempo tan an lo khel tawh ṭhin. Golden Eagles (Dempo sawina) hi kum 1968 khan din niin mipui 19,000 lenna Fatorda Stadium chu an khelmualah an hmang ṭhin.
India ram football league-a champion ngun ber an ni a, National Football league tih a nih lai khan kum 2005 leh 2007-ah khan an champion. I League tia kalphung thara India ram league sang ber kalpui a nih hnuah 2007-08, 2009-10, 2011-12 season-ah te khan a zawnin an champion. Season thum a zawna an champion ṭuma an coach hi Armando Colaco a ni.
Indian coach enkawlna hnuai-ah hian kum 2008 AFC Cup-ah semifinal an lut a, Indian club zinga AFC Cup-a a thiam pali zinga tel thei hmasa ber an ni. Goan club hian an nomawi hunna dawhkan lamah Durand Cup (1), Federation Cup (1) leh Indian Super Cup (2) an nei bawk.