Court-in MNF Vice President a koh vanga House bula buaina siamah MNF puh

Congress party ṭha­laite chuan thuchhuah siamin, MNF chu Assem­bly House kawta buaina siamah an puh a, nimina kawngzawha Assembly House an pan chu MNF vice president Dr R Lal­thangliana Court-in a koh vanga boruak dang siam an tum vang niin an tarlang.

MPYCC chuan, De­cember 6, 2016-a Assem­bly House-a chief minister Lal Thanhawla'n zawhna a chhan duh loh 'zawh belhna' chu chhan ngei ngei ngai kher lo niin an sawi a, "A chhàn loh chhuanlama a tûkah pawh hma la mai loa Assembly session zawh nía Assembly House kawta buaina siam tuma pungkhawm MNF ṭhalaite chêt dan hi a zahthlakin an demawm tak zet," an ti.

MNF vice president Dr R Lalthangliana chu nimin khan Special Judge (Prevention of Corruption)-in Court-ah a ko tih sawiin, MPYCC chuan, "Eirukna thubuai kaihhnawiha Court-in MNF Vice President a koh vanga MNF ṭhalaite'n rem lo chunga mawi leh mawi lo pawh thlu loa boruak dang siam an tum hi politics ṭha lo leh mipui chawk buaitu mai a ni," an ti a; MNF chêt dan chu mipui zahlohna a nih thu an sawi.

Congress ṭhalaite chuan, "MNF ṭhalaite hian PWD Minister-in zawhna zawh belhna a chhan loh vanga an lungawi lo a nih chuan lungawi lohna lantirna hun ni hnih an nei a, mahse, an ngawi tlat thung. December 8, 2016-a eirukna kaihhnawiha an Vice President Court-in insawifiah tura an koh avang hian a hliahkhuh turin Assembly session tihbuai tumin an che ta mai a ni," an ti.

MPYCC tarlan danin, Dr R Lalthangliana hi Preven­tion of Corruption Act 1988 hmanga ACB case No 5 of 2014 beh­chhanin December 8, 2016-a Court-a a inlan tura tih a ni a, mahse, a inlan loh avangin January 9, 2017-ah Court-a inlan tura tih leh a ni. Congress ṭhalaite chuan Dr R Lalthangliana chu Court-a inlan ngam turin an ngen.