Bible House bâwr velah lei a khî

Khatlaa Circuit House awmna ṭhina State Convention Centre sakna tura lei laih chu a chhak lamah a khî a, a chhaka Bible House leh Bible House kawta footpath leh MG Road kawngpui pawh a khi tel. Lei khi hi nimin zing khan UDPA minister Zodintluanga'n a en a, hna thawh chawlhsan rih turin a hriattir.

Lei a chet avang hian December 7, 2016 khan MG Road kawngpui chu a laiah ft. 30 vela seiin a khi a, tlemin a tlahniam bawk. Khatla Local Council chuan December 7 vek khan State Convention Centre sakna tura hna thawktute chu chawl rih turin 'stay order' a pe a; hmalak zel dan tur chu Aizawl Municipal Corporation (AMC) kutah an dah.

Nimin zinga enfiahnaah hian minister Zodintluanga chuan, lei khi chu Geology & Mineral Resources department leh Disaster Management Authority mithiamte'n an enfiah hma chuan chawlhsan rih turin a ti a; "Disaster report azirin hnathawk nghal tura inrin tur a ni a, ti tura an tih angin ni khata darkar 24-in hna thawh nghal tur a ni ang," a ti.

Bible House-a awmte chuan, an building dinna chu kumina lirnghing na berah tlemin a khî a, a hnua lirnghing lehah tlemin a khîk belh bakah, a thlanga State Convention Centre sakna tura lei laih hnuah a khîk belh leh niin an sawi.

Nimin zinga lei khi enfiahnaah hian AMC mayor PC Lalhmingthanga, deputy mayor Lal-ringliana leh councillor dang te, UDPA secretary Dr C Vanlalramsanga leh department officer dang te, Aizawl DC Kannan Gopinathan, Geology & Mineral Resources mithiamte leh Khatla Local Council member-te an tel a ni.