Ṭawng thei lo leh bengngawng sikul hawng

Mizorama naupang bengngawng leh ṭawng thei lo puala sikul hmasa ber, Deaf School of Mizoram, Vaivakawna mi chu nimin khan Social Welfare minister PC Lalthanliana’n a hawng.

Social Welfare Minister chuan, ri hriatna lama harsatna nei leh ṭawng thei lo naupangte tana zirna mumal tak buatsaihna kawngah bul ṭanna sikul hawn a ni chu lawmawm a tih thu sawiin, "Vawi leh khatah changtlung thut lo mah se, Central funded school a nih thuai ka beisei," a ti a; sikula hman atan computer pahnih a pe.

Social Welfare director Vanlaldini pawhin thu sawiin, "Heng naupangte tan hian thu sawina atan leh nunphung pangngai anga an nun theihna turin American sign language a pawimawh a, qualification-te nei ve a, sorkarah pawh an chanvo an luah theihna tur a nih avangin a pawimawh em em a ni," a ti.

Deaf School of Mizoram hi Hearing Impaired Parents’ Society of Mizoram (HIPSOM)-in an din a ni a, tunah hian Mizoram hmun hrang hrang aṭangin naupang 19, mipa pariat leh hmeichhia 11 awmin, zirtirtu pangain an enkawl a ni.