SFL Contender Fight hlawhtling takin buatsaih

India rama MMA Promotion company lian ber Super Fight League chu Mizoram khawpui Aizawlah rawn kalin contender fight an rawn huaihawt a, Mumbai leh Delhi-a contender fight an neih hnuah Aizawlah hlawhtling takin contender fight an rawn buatsaih.

Thawhlehni khan Siby Farm-ah East Zone contender fight hi neih a ni a, amateur fighter mi 60 telin, State dang 4 aṭangin fighters ṭha tak tak an tel nual bawk. SFL COO Rajesh Mehta leh National Coach Alan Fernandez te rawn kalin, fighter pahnih chauh thlang chhuak tur an nih laiin fighters ṭha tak tak an hmuh avangin mi pali an thlang ta a ni. Fighter an thlante hi Shantanu Baruah (Assam) - Fly Weight (-56.7 kgs); Vanlalchhuanga (Mizoram) - Bantam Weight (-61.2kgs); C.Lalduhawma (Mizoram) - Feather Weight (-65.8kgs) leh Manas Daimary (Assam) - Light Weight (-70.3kgs) te an ni.

He contender fight hi All India Mixed Martial Arts Association (AIMMAA) Sanctioned niin Mizoram State Mixed Martial Arts Association (MISMA) leh JSJ FitPro ten Aizawlah an thleng a ni.

SFL Season tharah hian team pariat an awm dawn a, February thla thleng kar tin fight a awm ang. SFL hian professional chauh ni lo, amateur fighter-te chher a pawimawhzia a hriat avangin India ram khawpui lian pariatah SFL Contender Fight a huaihawt ta a ni. SFL Contender Fight aṭang hian nakkum season thara inlan tur fighter thlanchhuah a ni mek a, Sony ESPN chuan fight zawng zawng hi a cover ang.