Arsenal tan chak a ngai

Zanin hian Europa League group stage khelh zawh a ni dawn a, group hmahruaitu ni tur chuan Arsenal tan hnehna chan a ngai - Gunners hian 11:25 hian Standard Liege an lenchilh ang. 

Premier League club dang Manchester United tan group L chung bera awm tlang turin an mikhual AZ Alkmaar laka tlawm loh a tawk. Wolves pawh an tling chiang tawh a, Nuno Espirito Santo-a naute hian Besiktas an hneh a nih chuan a chung bera awm theihna kawng a la inhawng bawk.

A zawna match kua ngawt chak ni hmel an hmuh loh hnuah Arsenal an chak ve leh tawh a, manager lailawk Freddie Ljungberg enkawl team hian an match hnuhnung berah West Ham 3-1 in an hneh.

Unai Emery hmunruak luahtu Freddie Ljungberg naute hian goal thum khung tur hian minute kua chiah hun an hmang, amaherawhchu nidang ang bawka an tlarhnung phui lo chu an buaina a la ni reng. Gunners hian Pathianni zanah Premier League khel turin champion lai Manchetser City an mikhual zui dawn a, Blegium rama an feh chhuahna hmunah hian player neih ṭhat zawng zawng chhawr ngawt a fuh kher lo ang.

Arsenal leh Standard Liege te hi tun hmain vawi nga an inhmachhawn tawh a, hengah hian Gunners an chak vek - tun ṭumah pawh hian chak tura rinkai an ni. Emirates Stadium-a an intawn ṭum pawhin Gabriel Martinelli-a goal hnih leh Joe Willock leh Dani Ceballos te hmangin 4-0 in an sawp.

Tun dinhmunah Gunners hi group F hmahruaitu an ni, zaninah hian hnehna an chang a nih chuan inkhel dang result ngaichang loin a chung berah an awm tlang ang. Mahse, point an hloh a nih a, an hnuaia mi Eintracht Frankfurt an chak chuan pahnihnaah an tlahniam thei dawn.

Gunners manager lailawk Ljungberg-a'n West Ham an hneh hnu khan, "Theihtawpa khel leh ball chan duha tlan kual reng player hmun an nuam," tiin a sawi a, zaninah pawh a tir aṭangin English club hian phur leh thatho takin an khelh nghal a rinawm.