Champion lai Liverpool an tlang

European champion Liverpool-in group stage-a Champions League mangṭha an inpeih lo tih khelmualah an pholang a, Thawhlehni zan khan Red Bull Salzburg chu 2-0 a hnehin last 16 an lut. 

Liverpool tan Naby Keita leh Mohamed Salah te chuan goal khat ve ve an khung a, Austrian club-in a chhanletna tur an neih loh avangin Liverpool hian group hmahruaitu nichungin knockout round an inpetkai. Group E inkhel dangah Napoli chuan 4-0 ngawtin Genk an sawp a, Reds hnungzuiin round of 16 an lut ve bawk. Italian club tan hian  Arkadiusz Milik chuan hattrick a siam a, Dries Mertens chuan goal khat a thawh ve bawk. 

Napoli-in hnehna an chan hnu lawkah chanchin dang an nei zui a, coach Carlo Ancelotti chu an ban - Italian coach an ban thu an puan hian inkhelh zawh aṭangin darkar thum pawh a liam hman lo!

Liverpool-in last 16 lut turin point hlawhchhuah an mamawh a, tun season-a match 24 an khelh tawha goal 87 khung thei Salzburg khelmualah an leng! Attacking football hmuh-nawm khel ṭhin team pahnih intawng an ni a, first half aṭangin chak ngei tumin an innawr tawn - Mohamed Salah chuan Reds fans tana ngeiawm khawpin a hlah hnem!

Salah hian vengtu nei lo chungin hnai set sawt aṭangin a pet goal thei lo a, second half-ah yard riat vel leka hla aṭangin bar chungah a thlawh bawk. Liverpool goalkeeper Alis-son a rim ve tho a, Brazilian goalkeeper hian first half-ah ringawt vawi ruk lai save a nei - Premier League hmahruaitu an nghing ve tho. 

Liverpool-in draw result-in last 16 an lut thei a, an chak chuan hmahruaitu an ni dawn thung - round of 16-a khingpui awlsam zawk neih theih nan Reds-in chak ngei an tum a, a tawpah goal an hlawh chhuak. Salzburg keeper Cican Stankovic chuan Sadio Mane ball khalh lai chhuhsak tumin a tlan chhuak a, a chesual. Senegalese forward hian Keita tan a cross a, Reds midfielder-in vengtu nei lo goal-ah a tauh lut. 

Minute hnih a liam a, Stankovic a chesual nawn a, Salah class sanzia kan hmu thung - Salzburg goalkeeper hian Egyptian forward ball ken lai chhuhsak a tum a, mahse Salah hian lo tlan helin a ke dinglamin a khung. Chance awlsam tak tak a khung loh zanah Salah-a'n angle chep lutuk karah a khung a, Europe-a a pem hnua penalty box pawn aṭanga a ke dinglam hmanga a pet goal hmasak ber a ni.

Liverpool chak zanah Napoli-in hnehna chang turin harsatna an tawk lo a, Milik chuan hattrick a siam - minute thumna aṭangin a khung ṭan a, a goal thumna hi penalty aṭanga minute 38-naa a khung a  ni. 

Napoli hian minute 74-naah penalty an hlawh chhuak nawn a, Mertens chuan harsatna nei loin goal-ah a chantir - kum 17 mi Genk goalkeeper Maarten Vandevoordt tan match hriatreng tlak a ni lo. Champions League-a a match hmasa ber kheltu Vandevoordt hi kum 17 leh ni 287 mi a ni a, European club football inelna sang bera goalkeeper inlan thei naupang ber record a siam. 

October 2017 khan Benfica goalkeeper Mile Svilar chuan Manchester United a hma-chhawn a, kum 18 leh ni 52 mi niin record a lo siam tawh - mahse Vandevoordt hian a rawn khum ta a ni. 

Ancelotti-a'n Champions League last 16-ah Napoli a hruai thleng a, ban a ni zui - Genk an sawp hmaa an match hnuhnung pakuaah Napoli hian chak an nei miah lo. Italian manager ropui hian ban a ni dawn tih a hre lawk bik lo. Genk an hneh zawhah media ho kawmin, "Genk laka kan chak hian min chhawk hle a, Serie A-ah pawh palina kan nih theih ka la beisei tlat," a ti a, club president De Laurentiis a biak tur thu thlengin a sawi. 

Mahse, a hnu lawkah Serie A-a pasarihna ni mek club hian thuchhuah siamin, "Carlo Ancelotti nen kan inṭhen ta," an ti a, Real Madrid boss hlui thlak tur hian AC Milan-a a lo enkawl tawh Gennaro Gattuso hming lamrik a ni. 

Chelsea tana Premier League nomawi pawh lo chawi tawh Ancelotti hi rei tak a awl erawh a rinawm loh a, Arsenal leh Everton nen sawizawm a ni nghal.