Arsenal hmachhawn theih Real leh Bayern?
Arsene Wenger chuan, "Group ṭhenkhatah chuan hmahruaitu aiin pahnihna an ṭha zawk' tiin a sawi lawk a, French manager hlauhthawn ang ngeiin UEFA Champions League knockout stage-a Arsenal hmachhawn theih zingah Real Madrid leh Bayern Munich te an tel. London club ang thoin mahni group-a hmahruaitu Leicester City hmabak a khirh a, pahnihnaa awm Manchester City khingpui a awlsam daih thei thung.
Thawhṭanni tlai
UEFA headquarters Nyon, Switzerland-ah Thawhṭanni tlai dar 4:30 hian Champions League last 16 intum tur hi pawh a ni dawn. Premier League club pali zinga pathum Gunners, Foxes leh City ten last 16 an lut a, Tottenham erawh Group E-ah pathumna an nih avangin Europa League knockout stage chinah an inlan zui thung ang.
Champions League last 16-ah hian group hmahruaitu ṭheuh an la inhmachhawn dawn lo a, ram khat aṭanga team inlan ho an la intum thei lo bawk - hei bakah hian group stage lama an awmpui nen an inhmachhawn zui thei lo.
Nakkum February 14/15 leh 21/22-ah te last 16 first leg khelh tur niin March 7/8 leh 14/15 khian second leg khelh leh tur a ni. Group tina hmahruaitute ṭheuh hi khualmualah zin chhuak hmasain anmahni khelmualah inkhel hnuhnung zawk an hmachhawn thei dawn tihna a ni.
Arsenal hmabak
Group A hmahruaitu Arsenal hian Premier League club dang Machester City leh Leicester an hmachhawn thei dawn lo. Group hmahruaitu dang Napoli, Barcelona, Atletico Madrid, Monaco, Borussia Dortmund leh Juventus te an pumpelh phawt a - an group lama an lo hmachhawn tawh Paris Saint-Germain nen an intum dawn lo chiang bawk.
Arsenal hmachhawn theih tur te chu Bayer Leverkusen, Bayern Munich, Benfica, Real Madrid, Porto leh Sevilla te an ni. Gunners tan thu lawmawm chu Barcelona an hmachhawn lo tur hi a ni ang. North London club hi a zawnin season ruk chhung chu quarterfinal lut zo loin an tla tawh a, hengah hian ṭum hnih chu Catalan club hneh loin an tla - hei bakah hian kum 2006 final-ah Barca hi 2-1 in an hneh lo bawk.
Pep-a hmabak
Pep Guardiola-a'n a club hlui Barcelona a tluk loh mah se Catalan club nen group khatah an awm avangin Lionel Messi awmna club hi last 16-ah an pumpelh. Manchester City hmachhawn theih theih tur zingah Atletico Madrid, Borussia Dortmund, Juventus, Monaco leh Napoli te an awm a, Pep hian champion lai Real Madrid bakah a club hlui Bayern Munich a pumpelh avangin pahnihna a nih avangin inchhirna tur a nei lo ang.
Chutihrualin Spanish manager Pep-a hmabak a awlsam dawn tihna erawh a ni lo a, Diego Simeone a enkawl Atletico Madrid leh Italian champion Juventus te hian group stage-ah goal hnih ve ve chiah an chhuah a, tlarhnung phui ber pahnih an ni. French Ligue 1 club Monaco hi Tottenham awmna Group E hmahruaitu ni thei an ni bawk.
German club Dortmund hi champion lai Real Madrid chunga awm chunga last 16 lut thei an ni bawk a, match ruk khelh aṭanga goal 21 tehmeuh khung thei an ni. City hian duh thlang thei chu ni se Italian club Napoli hi an thlan ngei a rinawm, amaherawhchu Italian club laka English club record thlirin tum châkawm an ni chuang lo.
Foxes mumang
Bayer Leverkusen, Bayern Munich, Benfica, Paris St-Germain, Real Madrid leh Sevilla te hi English champion Leicester City hmachhawn theihte an ni.
Chelsea manager hlui Claudio Ranieri-a'n season hmasa khan Leicester City chu a vawi khat nan Premier League nomawi a chawi pui a, football khawvel a barakhaih. English club hian Champions League-ah an duhthusam boruak a thleng dik zel a, match hnuhnung ber an khelh hmain group hmahruaitu an ni chiang tawh.
Drinkwater = Maradona
• Leicester star Danny Drinkwater chuan Champions League match ruk a khel ta a, Argentina legend Diego Maradona nen European Cup (UCL hming hmasa)-a an inlan zat a inang.
• Dortmund hian match ruk aṭanga goal 21 khungin Champions League group stage-a goal khung hnem ber an ni.
• Gianluigi Buffon-a'n Dinamo Zagreb a hmachhawn lo. Juventus keeper hian kum 2008 hnua a vawi khat nan Champions League-ah a inlan lo.
• Real Madrid hian an mahni khelmuala Champions League an khelh hnuhnung 33-ah goal an khung zawn tawh a, mahni khelmuala goal khung zawn rei thei ber an ni.
• Leicester City goalkeeper Ben Hamer chu English goalkeeper zingah Champions League match hmasa bera goal 5 chhuah theih hmasa ber a ni.
• CSKA Moscow hian an match hnuhnung 28-ah goal an chhuah ziah a, an keeper Igor Akinfeev hian Champions League match 39 zetah clean sheet a nei lo.
• Barcelona-in an khingpui Borussia Monchengladbach lakah vawi 993 zet ball an inpekual a, kum 2003-04 hnuah match khat chhunga in pass hnem ber an ni.