MPL-ah Police let dawn?

Mizoram Police-in RG Stadium-ah vawiin chhun dar 1:00-a New Serchhip FC an hneh a nih chuan MPL6 Qualifier champion ni chungin Mizoram football inelna sang berah an let ang. MPL4-ah table mawngphahah awmin Police hi an relegate a, tun season-ah erawh Aizawl DFA first division-ah awmin an ṭha fal hle. Mizoram Police hian awlsam taka final an luh hnuah Aizawl FC Academy 4-1 in an sawp a, MPL Qualifier-a an match hmasa berah Venghlui FC 6-1 in an sawi sa leh bawk. Vawiin hian Police-in MPL Qua­lifier-a an match hnuhnung ber an khel dawn a, Aizawl DFA first division cham­pion hi chak tura rinkai ni mah se an khingpui tur New Serchhip hi L&L Tournament champion an nih avangin kawng awlsam a ni lo ang. New Serchhip hian MPL-a player ṭha pawl ni pha R. Lalremruata (Arapa) leh C. Lalnuntluanga te an kawl a, FC Kulikawn winger hlui Arapa hian L&L Tournament-ah goal 11 khungin top scorer a nih bakah best player-ah thlan a ni bawk. Amaherawhchu New Serchhip-in loan hmanga MPL club Dinthar FC aṭanga an lak Lalruatpuia leh Vanneihtluanga te an chhawr thei dawn lo a, MPL5 finalist BVT defen­der Lalthanzama erawh transfer laia an lakluh a nih avangin an chhawr thei ang. Serchhip club tan Reitlang FC tana khel tawh winger Ralkapzauva bakah 1st MAP Academy midfielder hlui pahnih Ramhlun Vengthar tlang­val Remlalruata leh Saitual tlangval Lalhriatzuala te an pawimawh dawn a ni. New Serchhip FC pre­sident Zarzo­sanga chuan, "Police an ṭha tih kan hria a, kan draw phak chuan kan lungawi ang. Kan chak lo a nih pawhin Venghlui FC aia goal chhuah tlem kan tum dawn. Serchhip aṭanga MPL Qualifier khel thei hmasa ber kan ni hi kan lawm a, kan tling ta lo a nih pawhin kan player-te MPL club-te an la a nih chuan hlawhtlingah kan inngai ang," tiin Vanglaini palai a hrilh.

MPL Qualifier Fixtures & results

DECEMBER 8, Ningani

Mizoram Police 6 - 1 Venghlui FC

MPFC : Lalfakawma 7'; Lalramtharmawia 37'; TC Vanlalhruaia 69'; Lalfakzuala

85'; V. Lalṭanpuia 88'; F. Lalrinpuia 89'

VFC : C. Lalmuanpuia 79'

Vawiin inkhel tur, RG Stadium

1:00 PM New Serchhip FC vs Mizoram Police FC

December 12, Lammual

1:00 PM Venghlui FC vs New Serchhip FC

MPL Play Off Fixtures

December 14, Lammual

Ramhlun North FC vs Qualifier 2

December 16, Lammual

Qualifier 2 vs Ramhlun North FC