Mkhitaryan-a'n goal a khung ta Pathianni zanah United Vs Spurs

Henrikh Mkhitaryan-a'n halfway line pelh hret aṭangin ball a la lut a, Zorya Luhansk defender pathumin hual mah se Armenian midfielder hian la tlangin Manchester United tana a goal hmasa ber a khung.

Ningani zanah Manchester United-in Ukrainian club Zorya Luhansk chu 2-0 in an hneh a, Europa League knockout stage an lut. English club tan hian Borussia Dortmund midfielder hlui Mkhitaryan bakah Zlatan Ibrahimovic-a'n goal a khung bawk.

Swede forward Ibra hian match hnuhnung pasarihah goal ruk a khung a, Ivorian defender Eric Bailly-a'n October thlaa a inhliam hnuah a vawi khat nan a khel tluan bawk. Zorya khelmual Slavutych Arena pitch ṭha tawk lo mah se United-in first half-ah 76% zet ball an chang a, Jose Mourinho hote hi Fenerbahce hnuaiah awm mah se pawisa thapna lamah chuan inelna champion turin rinkai an ni phak.

Saints an tla

Southampton-in an mualah Hapoel Be'er Sheva chu 1-1 in an draw a, Israeli club hian an club history-a a vawi khat knockout stage an lut.

Saints leh Hapoel Be'er Sheva hian point riat ve ve an hmu a, goal difference-ah English club hi ṭha zawk mah se khualmualah goal an khung loh avangin away goal rule hmangin an tla.

United Vs Spurs

Tottenham Hotspur-in Champions League knockout stage an thleng pha lo a, Europa League last 32 khel tur khawp erawh chuan an result a ṭha. Mauricio Pochettino hote hi seeded an ni dawn a, Manchester United hi seeded ni pha lo mah se ram khat an nih avangin Europe inelnaah chuan an la inhmachawn dawn lo.

Amaherawhchu Spurs hian Pa-thianni zan dar 7:45 hian Old Trafford an tlawh dawn a, United nena an inkhel tur hi Premier League inkhel pawimawh a ni. Mourinho hote hian Spurs hi an hneh lo a nih ngat chuan December thla lai hawl chauh ni mah se champion thei zing aṭanga dah bo an ni tawh ang.

Spurs hi tunah hian United aiin point rukin an sang mek a, English forward Harry Kane-a'n inelna hrang hrang match hnuhnung pangaah goal ruk a khung a, Chelsea lakah chiah goal a khung lo. Pochettino hote hian kartawp khan Swansea 5-0 in an sawp a, Europa League khel thei turin UCL group match hnuhnung berah CSKA Moscow 3-1 in an hneh bawk a, tun hi Old Trafford pan hun takah a ngaih theih.

Nizan Inkhel Results

Osmanlispor 2 - 0 Zurich

Villarreal 2 - 1 Steaua Bucuresti

Konyaspor 0 - 1 Gent

Sporting Braga 2 - 4 Shakhtar Donetsk

Qarabag 1 - 2 Fiorentina

PAOK 2 - 0 Slovan Liberec

Rapid Wien 1 - 1 Athletic Club

Viktoria Plzen 3 - 2 Austria Wien

Astra 0 - 0 Roma

AZ 3 - 2 Zenit

Maccabi Tel Aviv 2 - 1 Dundalk

Young Boys 3 - 0 Astana

APOEL 2 - 0 Olympiakos Piraeus

Feyenoord 0 - 1 Fenerbahce

Zorya 0 - 2 Manchester United

Mainz 05 2 - 0 Qabala

Anderlecht 2 - 3 Saint-Etienne

Standard Liege 1 - 1 Ajax

Panathinaikos 0 - 2 Celta de Vigo

Internazionale 2 - 1 Sparta Praha

Southampton 1 - 1 Hapoel Be'er Sheva

Salzburg 2 - 0 Schalke 04

Nice 2 - 1 Krasnodar

Sassuolo 0 - 2 Genk

Europa Last 32 Draw

• December 12, Thawhṭanni tlai dar 5:30-ah Europa Last 32 draw hi neih a ni dawn.

• Group hmahruaitu team 12 bakah Champions League-a pathumna zinga point hmu ṭha pali te chu seeded an ni a, group tina pahnihna bakah UCL-a aṭanga tla thla pali dang an awm bawk.

• Group khata awm leh ram khata awm club an inhmachhawn thei lo.

• Last 32 hi February 16 leh 23, Ningani zanah khelh tur a ni a, seeded team-in second leg hi anmahni mualah an khel ang.

Seeded: Ajax, APOEL, Besiktas*, Fenerbahce, Fiorentina, Copenhagen*, Lyon*, Osmanlispor, Roma, Schalke, Shakhtar Donetsk, Sparta Praha, St-Étienne, Tottenham*, Zenit, Genk

Unseeded: Anderlecht, Astra Giurgiu, AZ, Celta Vigo, Gent, Hapoel Beer-Sheva, Krasnodar, Legia Warszawa*, Ludogorets*, Manchester United, Borussia Monchengladbach*, Olympiacos, PAOK, Rostov*, Villarreal, Athletic Bilbao

* Champions League aṭanga tla te