Infantino-a'n a duh tam tawlh tawlh

FIFA president Gianni Infantino chuan World Cup-a tel ṭhin zat team 32 chu 48-ah tihpun a duh thu a sawi.

February-a FIFA hotupa ber dinhmun chelhtu hian World Cup-ah team 40 teltir a duh thu a lo sawi tawh a, tunah pariatin a tipung leh ta. Kum 46-a upa Infantino hian FIFA president a chuh dawn khan ram tam zawkin World Cup khel ve thei se a duh thu a lo sawi tawh a, a campaign au hla berah a lo nei tawh a ni.

Infantino-a duhdan ang chuan team 48 hi group 16-ah ṭhen hran an ni ang a, group khatah team pathum zel awmin a sang pahnihin last 32 an lut ang. UEFA secretary general hlui duhdan hi January-a FIFA Council neih hunah la ngaihtuah chauh tur a ni a, a duhdan ang hi pawm a ni a nih pawn a hman ṭan hun tur dik tak chu 2026 World Cup aṭang chauhin a ni ang.

FIFA World Cup-a team tel thei zat an tihpun hnuhnung ber chu 1998 World Cup kha a ni a, France-a neih he inelnaah hian World Cup-a tel ṭhin team 24 chu 32-ah tihsan a ni. UEFA Euro 2016 khelh zawh takah khan team 24 an inel a, kum 1996 aṭanga ram tel
ṭhin 16 aṭanga tihsan a ni.

Infantino-a duhdan ang taka World Cup kalphung hi tih danglam a ni a nih loh pawn ruahmanna dang ala awm cheu a, chungte chu;

• Team 48 hmang thoa inel a ni ang. Qualifying round pangngaia tling team 16 chu group stage an inpet kai sa ang. A bak 32 chuan vawi khat ṭheuh inkhelin a chak zawk zelin team 16 hi an zawm ve leh ang.

• Team 40-ah tihpun a ni ang a, group 10-a team pali zela ṭhen hran a nih loh pawn group pariatah team panga zelin ṭhen hran a ni ang.

• A dan pangngaiin team 32 ang zela kalpui pawh a ni thei.